„ქართული ოცნების“ თბილისის მერობის კანდიდატი ვარკეთილის მოსახლეობას შეხვდა და ინფრასტრუქტურულ პროექტებს გაეცნო

„ქართული ოცნება – დემოკრატიული საქართველოს“ თბილისის მერობის კანდიდატი კახა კალაძე წინასაარჩევნო კამპანიის ფარგლებში, მოსახლეობასთან შეხვედრებს განაგრძობს. კახა კალაძე ამჯერად, დედაქალაქის საკრებულოში სამგორის რაიონის მაჟორიტარი დეპუტატობის კანდიდატ რევაზ სოხაძესთან ერთად, ვარკეთილის დასახლებას ეწვია.

თბილისის მერობისა და სამგორის მაჟორიტარობის კანდიდატები ვარკეთილის ზემო პლატო, მეორე მიკრორაიონის მოსახლეობას შეხვდნენ და N25-N26 საცხოვრებელ კორპუსებს შორის არსებული სკვერი დაათვალიერეს. შეხვედრაზე აღინიშნა, რომ ამავე მისამართზე, მოსახლეობის მოთხოვნიდან გამომდინარე, დაპროექტდა და მოეწყო საბავშვო გასართობი სივრცე, ველობილიკი, ატრაქციონები და ფიტნეს ზონა.

„პირობას გაძლევთ და ვპირდები თბილისს, რომ მომდევნო ოთხი წელი იქნება კიდევ უფრო აქტიური, ვიშრომებთ კიდევ უფრო თავდაუზოგავად, გვაქვს ამბიცია, რომ ქალაქში განვახორციელოთ მასშტაბური და მნიშვნელოვანი პროექტები. ჩვენთვის არ არსებობს გარკვეული უბნები, რომელთაც უფრო მეტი ყურადღება ექცევა – ყველას თანაბრად ვუნაწილებთ არსებულ ბიუჯეტს და ყველა რაიონთან და უბანთან მიმართებაში, თანაბარი მიდგომა გვაქვს. ჩვენი საარჩევნო სლოგანია „მეტი სიცოცხლე ყველა უბანში“ და ეს არ არის უბრალოდ სიტყვები. ამ სიტყვების უკან დგას ძალიან მნიშვნელოვანი პროექტები და ხედვა, რომელსაც საზოგადოებას რამდენიმე დღეში წარვუდგენ. ამ ყველაფერს მხოლოდ მე ვერ გავაკეთებ, რადგან მნიშვნელოვანია, ძლიერი გუნდი საკრებულოში, პროფესიონალი ადამიანები მერიაში და რა თქმა უნდა, საზოგადოების მხარდაჭერა და თანადგომა“, – განაცხადა თბილისის მერობის კანდიდატმა. 

კახა კალაძემ და რევაზ სოხაძემ დღესვე, დაათვალიერეს ვარკეთილის მეორე მიკრორაიონში არსებული დასასვენებელი სივრცე. ასევე, გაეცნენ სუხიშვილისა და თაყაიშვილის ქუჩების მიმდებარედ რეკრეაციული სივრცის მოწყობის სამუშაოებს და მოსახლეობას შეხვდნენ. შეხვედრაზე ქალაქში მწვანე სივრცეების მოწყობასა და ჯანსაღი ცხოვრების პოპულარიზაციას გაესვა ხაზი. აღინიშნა, რომ დასასვენებელი სივრცის გარდა, ამავე ტერიტორიაზე ფეხბურთისა და კალათბურთის მოედნები, შადრევანი და ატრაქციონები მოეწყობა.

კანდიდატები ვარკეთილის მეორე მიკრორაიონში, N1-N2-N3 და N9 საცხოვრებელი კორპუსების მიმდებარედ იმყოფებოდნენ, სადაც ასევე, დასასვენებელი სივრცე მოეწყო. გარდა ამისა, თბილისის მერობისა და სამგორის მაჟორიტარი დეპუტატობის კანდიდატებმა ვარკეთილი 3-ის მეოთხე მიკრორაიონში, N420 საცხოვრებელი კორპუსის მიმდებარედ არსებული რეკრეაციული სივრცეც დაათვალიერეს, რომელიც მიმდინარე წელს მოეწყო. ადგილობრივ მოსახლეობასთან შეხვედრაზე აღინიშნა, რომ ჯანსაღი ცხოვრების წესის პოპულარიზაციის მიზნით, ამავე ტერიტორიაზე განხორციელდება სპორტული მოედნის რეაბილიტაციაც.

„ბოლო ოთხი წლის განმავლობაში, გაკეთდა იმდენი რამ, რაც ქალაქში არასდროს გაკეთებულა. ჩვენ კიდევ უფრო მეტი ძალით უნდა ვიმუშაოთ და ვარკეთილის დასახლებაში კიდევ უფრო მეტი პროექტი განვახორციელოთ. ბედნიერი ვარ, რომ ვარ ამ გუნდის წევრი, მაქვს საშუალება, მათთან ერთად, ყველა მნიშვნელოვან პროექტში მონაწილეობა მივიღო და ჩემი წვლილიც შევიტანო. თქვენ, სამგორელებს უნდა გქონდეთ იმის ამბიცია, რომ ერთ-ერთ საუკეთესო უბანში იცხოვროთ და ვარკეთილი თბილისში ერთ-ერთი ყველაზე საუკეთესო საცხოვრებელი უბანი გახდეს.  დარწმუნებული ვარ, ამას აუცილებლად მივაღწევთ. თქვენი მხარდაჭერის იმედი გვაქვს, რადგან პროექტებში თქვენი ჩართულობა მნიშვნელოვანია. ჩვენი მხრივ კი, მაქსიმალურად დავიხარჯებით იმისთვის, რომ გემსახუროთ“, – განაცხადა რევაზ სოხაძემ.  

ვარკეთილის მოსახლეობასთან შეხვედრებს კახა კალაძის საარჩევნო შტაბის ხელმძღვანელი გიორგი ამილახვარი, ასევე, პარლამენტისა და საკრებულოს სამგორის რაიონის მაჟორიტარი დეპუტატები ესწრებოდნენ.