„ქართული ოცნება – დემოკრატიული საქართველოს“ ხაშურის მერობის კანდიდატი თენგიზ ჩიტიაშვილი შეხვდა ღვინის ქარხნის დასახლების, კლდიაშვილისა და წმინდა ნინოს (ყოფილი სპორტის), ასევე ფალიაშვილისა და ლესელიძის ქუჩის მცხოვრებლებს. ინფორმაციას პარტია ავრცელებს.
შეხვედრა გაიმართა ქალაქის ცენტრალურ პარკშიც. ხაშურის მთავარ პრობლემას წყალმომარაგება წარმოადგენს, რაც, ასევე, აფერხებს საგზაო ინფრასტრუქტურის გამართვას.
როგორც ცნობილია, დღეს ხაშურის წყალმომარაგებასთან დაკავშირებით კიდევ ერთი შეხვედრა შედგა გაერთიანებული წყალმომარაგების კომპანიის, ადგილობრივი ხელისუფლების და ფრანგული საკონსულტაციო კომპანიის წარმომადგენლების მონაწილეობით. ხაშურის წყალმომარაგებისა და წყალარინების პროექტის განხორციელება, რომელსაც საფრანგეთის განვითარების სააგენტო და ევროკავშირი აფინანსებს, მომავალი წლის პირველი ნახევრიდან დაიწყება.
პროექტის ფარგლებში მოეწყობა 209 კმ-იანი ქსელი, მაგისტრალი, ორი სათავე ნაგებობა, სამი რეზერვუარი და გამწმენდი ნაგებობა. პროექტის დასრულება 2025 წლისთვის არის დაგეგმილი.
„მოხარული ვარ, რომ ხაშურის 24-საათიანი წყალმომარაგების და წყალარინების პროექტის განხორციელებისთვის ყველა წინაპირობა შექმნილია და უშუალოდ სამუშაოების დაწყებამდე მხოლოდ ფორმალური პროცედურებია დარჩენილი. ეს იქნება საუკუნის პროექტი, რომელიც მნიშვნელოვნად გააუმჯობესებს როგორც ხაშურელების, ისე ოსიაურისა და ცხრამუხის მოსახლეობის ყოველდღიურობას.
წყალმომარაგებისა და წყალარინების პროექტის განხორციელება საშუალებას მოგვცემს, გზების რეაბილიტაციაზეც ვიზრუნოთ.
მოქალაქეები იმედიანად ელიან პროექტის განხორციელებას, რაც, ამავე დროს, ადგილობრივებისთვის დამატებით სამუშაო ადგილებს შექმნის.
დღევანდელი შეხვედრები მეც იმედიანად განმაწყობს და მჯერა, მოქალაქეთა თანადგომით ყველა პრობლემის მოგვარებას შევძლებთ“, – განაცხადა თენგიზ ჩიტიაშვილმა.
კომენტარები