პოეტს ავტოკრატი ვერ მოუგებს, – ასე აფასებს მწერალი ლაშა ბუღაძე ზვიად რატიანის დაკავებას და ამბობს, რომ “ ბიძინა ივანიშვილის მმართველობითი სისტემა, მას ვერაფერ დაუშავებს“.
ბუღაძე რატიანის და ტიციან ტაბიძის მდგომარეობას ადარებს და ამბობს, რომ მასაც ისეთივე მტერი ჰყავს, რომელიც თავის დროზე სწორედ ტიციანს ჰყავდა, თუმცა “სტალინმა ვერც მას დაუშავა რამე“.
ვისაც უყვარს ლიტერატურა, მან იცის ზვიად რატიანის ფასი, შესაძლოა, მისი ფასი არ იცოდეს და არც იცის ივანიშვილმა, კობახიძემ და მისმა ჭანჭიკებმა, მაგრამ ქართული ლიტერატურის ისტორიაში ზვიად რატიანს დიდი ადგილი აქვს. სახელმწიფო, მითუმეტეს, ასეთი ავტოკრატული, ანაქრონისტული მოვლენა, როგორიც არის ბიძინა ივანიშვილის მმართველობითი სისტემა, ვერაფერ დაუშავებს ზვიად რატიანს. სტალინმა ვერ დაუშავა ვერაფერი ტიციან ტაბიძის სახელს და მიხელ ჯავახიშვილს და სხვას და სხვას. პოეტს ავტოკრატი ვერ მოუგებს. ეს ჯერ კიდევ სენეკა და ნერონის დაპირისპირებიდან არის ცნობილი. იგივე მტერი ჰყავს რატიანს, რუსული რეჟიმის და ივანიშვილის ბანდის გამოვლინებით და პოეტიც ისე უპირისპირდება, როგორც მას შეუძლია,-განაცხადა ბუღაძემ “პირველ ხაზში“.
შეგახსენებთ, რომ ზვიად რატიანი პარლამენტთან მიმდინარე აქციის დროს, 23 ივნისს დააკავეს. მას ბრალდება საქართველოს სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა, პოლიციელის სამსახურებრივ საქმიანობასთან დაკავშირებით) წარედგინა, რაც 4-დან 7 წლამდე თავისუფლების აღკვეთას ითვალისწინებს.
ზვიად რატიანს აღკვეთის ღონისძიების სახით პატიმრობა შეეფარდა.
კომენტარები