31 აგვისტოს 66 წლის ასაკში პოეტი და პროზაიკოსი, ზურაბ სამადაშვილი გარდაიცვალა. ინფორმაციას “პრაიმტაიმი” ავრცლებს. პოეტის გარდაცვალების მიზეზი ციროზი გახლდათ.
ზურაბ სამადაშვილმა ბოლო წლები იავადმყოფა. სოციალურ ქსელში მადლობასაც უხდიდა ექიმს.
“მადლობა ონკოქირურგ გიორგი მეტივიშვილს, რომელმაც ამ ქვეყნისკენ მომაბრუნა და გარკვეული დრო კიდევ მაჩუქა” – წერდა პოეტი “ფეისბუქზე.”
ზურაბ სამადაშვილი დაიბადა თბილისში, 1955 წლის 29 იანვარს.
1972 წელს დაამთავრა თბილისის 51-ე სკოლა და იმავდროულად მუსიკალური სასწავლებელი, ხოლო 1977 წელს — საქართველოს აგრარული უნივერსიტეტის ტექნოლოგიური ფაკულტეტი, ინჟინერ-ტექნოლოგის სპეციალობით.
მისი ლექსები პირველად ჟურნალ „ნობათში“, 1983 წელს დაიბეჭდა, ხოლო პროზაული დებიუტი კი შედგა მოთხრობით „დუბლინელები“, 1986 წელს.
ზურაბ სამადაშვილი 2010-2012 წლებში იყო გალა (ლიტერატურული პრემია) ჟიურის წევრი.
მწერალი და დრამატურგი, მიხო მოსულიშვილი კოლეგისა და მეგობრის გარდაცვალებაზე პირველ კომენტარს აკეთებს.
მიხო მოსულიშვილი: – ერთად რომ ადიხართ მთაზე და უცებ თოკზე ჩაბმული მეწყვილე მოწყდება… – აი, ესე მომივიდა ახლა.
ოცდაათ წელზე მეტია ერთად მოვდივართ მწერლობაში, ძალიან კარგი წიგნების, ლექსების, პიესების ავტორი იყო ზურა და ძნელია, ძალიან სამწუხაროა მაგისი წასვლა…
ერთ-ერთი სიმი რომ გაუწყდება გიტარას და დადებ და დანანებით უყურებ, ხმა ვეღარ ამოგიღია, – აი, ესე ვარ ახლა.
კომენტარები