კროპივნიცკის ცენტრში, შვიდი წლის სკოლის მოსწავლე ვარვარა ხლევიცკაია ტიტებს ყიდდა, რათა უკრაინელი ჯარისკაცებისთვის ბრონის ჟილეტი ეყიდა. ამის შესახებ UNIAN იუწყება.
თავდაპირველად, გოგონა ფულს ახალი ტელეფონისთვის აგროვებდა, მაგრამ შემდეგ სამხედროებისთვის ბრონის ჟილეტის ყიდვა გადაწყვიტა. ყულაბაში ბრონის ჟილეტისთვის საკმარისი თანხა არ აღმოჩნდა, ამიტომ, გოგონამ დანარჩენი თანხის მოგროვება ყვავილების გაყიდვით გადაწყვიტა.
“მე თვითონ მინდა დავეხმარო ჯარისკაცებს”, – თქვა ვარვარამ.
“იყიდე ყვავილი და მე ვიყიდი ბრონის ჟილეტს”, – ასეთი წარწერა ჰქონდა გაკეთებული მას ყვავილების დახლზე.
“როდესაც ტელევიზორში დაინახა წარწერა “დახმარება სამხედროებისთვის”, დაიწყო ფიქრი, თუ როგორ შეეძლო დახმარებოდა”, – თქვა მარინა ხლევიცკაიამ, ვარვარას დედამ.
გოგონას ყვავილები ადგილობრივმა ფლორისტებმა უსასყიდლოდ აჩუქეს. რამდენიმე საათში ვარვარამ 4 000 გრივნა შეაგროვა.
“ფულს ახალი “აიფონისთვის” ვაგროვებდი, მაგრამ გადავწყვიტე, სამხედროებისთვის მეჩუქებინა”, – თქვა გოგონამ.
შეგროვებული თანხით მოხალისეებმა ბრონის ჟილეტი შეიძინეს. ერთ-ერთმა ადგილობრივმა მაღაზიამ კი გოგონას ახალი ტელეფონი აჩუქა.
კომენტარები