სოციალურ ქსელში აქტიურად ვრცელდება ვირუსული ლინკი, რომელსაც ფეისბუკის მომხმარებლები მეგობრებისგან პირად შეტყობინებებში იღებენ. ლინკი სავაჭრო ქსელ „კარფურის“ სახელით ვრცელდება, როგორც ირკვევა, კომპანიის საიუბილეო დღესასწაულთან დაკავშირებით.
აღნიშნულს „კარფურის“ ადმინისტრაცია ეხმაურება და შემდეგ განცხადებას ავრცელებს:
„შევიტყვეთ, რომ ბევრი თქვენგანი იღებს საეჭვო შეტყობინებებს Carrefour – ის სახელით. გაცნობებთ, რომ აღნიშნული შეთავაზება არ წარმოადგენს სინამდვილეს და არ იგზავნება კარფურ საქართველოს მხრიდან!
კარფურის ოფიციალური შეთავაზებები და აქციები მხოლოდ და მხოლოდ ქვეყნდება კარფურის ოფიციალურ Facebook და Instagram გვერდებზე, ან კომპანიის ოფიციალურ ვებ-გვერდსა და აპლიკაციაში! გთხოვთ, საეჭვო შეტყობინებებმა არ შეგიყვანოთ შეცდომაში და არ გადახვიდეთ ლინკზე“, – ნათქვამია გავრცელებულ განცხადებაში.
ცნობისთვის, მსგავსი შემთხვევა გასულ კვირასაც მოხდა – ტანსაცმლის მაღაზია H&M-ის სახელით ვირუსული ლინკი გავრცელდა. როგორც კომპანიაში განმარტეს, მომხმარებლებს საქმე თაღლითურ გათამაშებასთან ჰქონდათ.
კომენტარები