ელენე ხოშტარია ექიმებს მიმართავს. მოშიმშილე დეპუტატი მადლობას უხდის იმ მედიკოსებს, რომლებიც მის ჯანმრთელობაზე ზრუნავენ, თუმცა ამბობს, რომ ის კრიზისი რომელიც ახლა ქვეყანაშია ცდება პარტიულ და პოლიტიკურ ჩარჩოებს და ეს კრიზისი ეხება ყველა პროფესიას:
“მიხეილ სააკაშვილის მდგომარეობასთან დაკავშირებით, ჩვენ გვქვს წარმოუდგენლად ჩიხური მდგომარეობა. პრაქტიკულად არ ვიცით და ალაგ-ალაგ, სხვადასხვა წყაროებით ვიგებთ ობიექტურ ინფორმაციას მის ჯანმრთელობასთან დაკავშირებით. მეტიც, ცნობები, რომელიც გამოდის ბოლო დღეებში და ბოლო საათებში, არის ძალიან საგანგაშო.” ამბობს ხოშტარია.
მისივე თქმით, გლდანის ციხეში, მიხეილ სააკშვილის მკურნალობასთან დაკავშირებით კითხვები ლეგიტიმურია:
“ჩვენ ვხედავთ, რომ სახელმწიფო არ იცავს მიხეილ სააკშვილის სიცოცხლის და ჯანმრთელობის უფლებებს. აქედან გამომდინარე დიდი პატივისცემით და მოწიწებით, მინდა მივმართო ექიმებს, ყველა ექიმს, ვისაც შეუძლია გამოიჩინოს ინიციატივა და ეცადოს ჩაერთოს მიხეილ სააკაშვილის მდგომარეობის გაგებისა და მკურნალობის პროცესში და კონკრეტულად იმ ექიმებს, რომლებიც შედიოდნენ კონსილიუმში და აქვთ ინსტიტუციური ბერკეტი რომ ჩაერიონ სიტუაციაში” ამბობს ხოშტარია.
დეპუტატმა კონკრეტული ექიმების გვარები დაასახელა და სთხოვა მათ გლდანის ციხის დაწესებულებაში შესვლა. მათ შორის არიან ნევროლოგი ალექსანდრე ცისკარიძე, იორგი გოცაძე კრიტიკული მედიცინის დოქტორი, ასევე ნინო შარაშენიძე და ელენე გიორგაძე:
“მოგმართავთ ადამიანი, რომელიც ასევე შიმშილობს მე-12 დღეა…ნუ დაელოდებით პენიტენციური სამსახურის მითითებას, მოითხოვეთ ბატონ მიხეილ სააკაშვილთან შესვლა” -განაცხადა ელენე ხოშტარიამ ცოტა ხნის წინ გამართულ ბრიფინგზე.
რაც შეეხება მის შიმშილობას, ხოშტარია ამბობს, რომ არ აპირებს შეწყვიტოს, ვიდრე მიხეილ სააკაშვილს სამოქალაქო კლინიკაში არ გადაიყვანენ.
კომენტარები