ბიბლიოგრაფი, ბიბლიოთეკათმცოდნე ნინო კალანდარიშვილი გარდაიცვალა. ინფორმაციას ამის შესახებ ნინოს მეგობრები სოციალურ ქსელში ავრცელებენ და მას თბილი სიტყვებით იხსენებენ.
გთავაზობთ ნინო კალანდარიშვილის ინტერვიუს, რომელსაც “თბილისის მულტიფუნქციური ბიბლიოთეკები” აქვეყნებს:
“ზუსტად ოცდათხუთმეტი წელიწადია, წიგნისა და წიგნის მოყვარულთა სამსახურში ვარ. 1984 წელს, უნივერსიტეტის წარჩინებით დამთავრებისთანავე, თბილისის ცენტრალიზებული საბიბლიოთეკო სისტემის 23-ე ფილიალში დავიწყე მუშაობა. გამოცდილება არ მქონდა, მაგრამ თანამშრომლების სახით დიდი და მოსიყვარულე ოჯახი დამხვდა. მათგან ბევრი ისეთი ვისწავლე, რასაც უნივერსიტეტში ვერ ისწავლიდი. განსაკუთრებული პატივისცემით მოვიხსენიებ და სიყვარულით ვუხდი მადლობას ჩემს მაშინდელ ხელმძღვანელს, ფილიალის გამგე მაყვალა თვარაძეს. ამ ქალბატონმა მასწავლა ადამიანებთან ურთიერთობა, რომ მკითხველი კეთილგანწყობითა და ღიმილით უნდა მიიღო და არასდროს გაისტუმრო უარით. ალბათ, ამიტომაცაა, რომ ამ წლების განმავლობაში, ჩემი საბიბლიოთეკო საქმიანობის ყველა საფეხურზე, უამრავ ცნობილ თუ უცნობ ადამიანთან მქონდა ურთიერთობა, ვისგანაც ყოველთვის უდიდეს სიყვარულსა და პატივისცემას ვგრძნობდი და დღემდე ვგრძნობ.
მძიმედ მახსენდება ომის შემდგომი პერიოდი, 90-იანი წლები. უტრანსპორტობის გამო ბევრჯერ ფეხით დავბრუნებულვარ აღმაშენებლის გამზირიდან დიღმის მასივში, მაგრამ ყინვისგან გათოშილსა და უხელფასოსაც არ მიფიქრია საყვარელი ბიბლიოთეკის მიტოვება. მე და ჩემმა თანამშრომლებმა ათასობით წიგნი გადავარჩინეთ და მხრებით მოვიტანეთ აქამდე – ზუსტად ისე, როგორც თბილისის სხვა ბიბლიოთეკების შემთხვევაში იყო.
წიგნის ბიბლიოთეკის თაროზე სწორად მოთავსება არც ისე მარტივი საქმეა. ყველა წიგნს თავისი მისამართი აქვს, რათა ადვილად მოძებნო და მკითხველს დროულად მიაწოდო. ამისთვის ვიყენებთ უნივერსალურ ათწილად კლასიფიკაციას, რომელიც გულისხმობს მსოფლიოს ათი ცოდნის, ყველა იმ დარგის, რომელზეც აქამდე წიგნი დაწერილა (ეს იქნება მეცნიერება, მედიცინა, ტექნიკური საგნები თუ სხვა), 0-დან 9-მდე რიცხობრივი შესაბამისობით დაყოფას. მაგალითად, წიგნები, რომლებიც მოიცავენ მასალას საბანკო საქმის შესახებ, თავს მოიყრიან 336.7 განყოფილებაში, მხატვრული ლიტერატურა კი 821 განყოფილებაში. იმავე შინაარსის წიგნები, მსოფლიოს ნებისმიერ ბიბლიოთეკაშიც, ამავე ინდექსით იქნება განთავსებული. როგორც ხედავთ, საბიბლიოთეკო საქმიანობა მთელი მეცნიერებაა და არა მხოლოდ მკითხველის მომსახურება, ამიტომ ამ პროფესიას გაფრთხილება და ახალი თაობებისთვის გადაცემა სჭირდება”
კომენტარები