ნატომ მიიღო გადაწყვეტილება კიევში ოფისის დახურვის შესახებ. თანამშრომელთა ნაწილი ლვოვში, ნაწილი კი ბრიუსელში გადავიდა. ამის შესახებ „უნიანი“ იუწყება.
ჩრდილოატლანტიკური ალიანსის მიერ გავრცელებულ ინფორმაციაში აღნიშნულია, რომ ოფისი „დროებით დაიხურება“.
„ნატო და მისი წევრი ქვეყნები ზედმიწევნით აკვირდებიან სიტუაციას და უსაფრთხოების ყველა აუცილებელ ზომებს იღებენ. ჩვენი თანამშრომლების უსაფრთხოება ჩვენი პრიორიტეტია, ამიტომ ჩვენ ისინი ლვოვსა და ბრიუსელში გადაგვყავს. შესაბამისად, ნატოს ოფისი უკრაინაში არ დახურულა და ის ფუნქციონირებას განაგრძობს“ – წერია განცხადებაში.
უკრაინის წინააღმდეგ რუსული აგრესიის საფრთხის ფონზე ზოგიერთმა ქვეყანამ კიევში საელჩო დახურა ან ის სხვა ქალაქებში გადაიყვანა. კანადამ და ავსტრალიამ კიევიდან საელჩოები გაიყვანა. გერმანიამ კი საკონსულო დნეპრიდან ლვოვში გადაიტანა და თანამშრომელთა რაოდენობა შეამცირა.
ევაკუაცია იაპონიის საელჩომაც გამოაცხადა, თუმცა მისი თანამშრომლების ნაწილი კიევში ჯერ კიდევ რჩება. ისრაელის საგარეო საქმეთა მინისტრმა განაცხადა, რომ რუსული აგრესიის შემთხვევაში ისრაელის საელჩო ასევე ლვოვში იქნება გადატანილი.
საფრანგეთის საელჩომ უკრაინაში მყოფ მოქალაქეებს მოუწოდა შეიძინონ საკმარისი მარაგის სასმელი წყალი, საკვები და თბილი ტანსაცმელი.
კომენტარები