კიბერშეტევების შედეგად, კერძოდ, რუსეთისა და ჩინეთის მხრიდან, ნამდვილი ომის საფრთხე იზრდება. ამის შესახებ აშშ-ის პრეზიდენტმა, ჯო ბაიდენმა აშშ-ს ეროვნული დაზვერვის დირექტორის ოფისში ნახევარსაათიანი გამოსვლის დროს განაცხადა. ინფორმაციას სააგენტო Reuters ავრცელებს.
”მე ვფიქრობ, რომ ომის ალბათობა იზრდება – რეალური ომის, იარაღით, დიდი სახელმწიფოს წინააღმდეგ – ეს კიბერსივრცეში მოქმედების შედეგი იქნება”, – განაცხადა ბაიდენმა.
მან ასევე ისაუბრა ჩინეთიდან მომდინარე საფრთხეებზე, რომელიც 2040-იანი წლების შუა პერიოდში, შესაძლოა, “მსოფლიოში ყველაზე ძლიერი სამხედრო ძალა” და “მსოფლიოში უდიდესი ეკონომიკის მქონე” ქვეყანა გახდეს.
სიტყვით გამოსვლისას ბაიდენმა ასევე მადლობა გადაუხადა ამერიკული სპეცსამსახურების წარმომადგენლებს, ხაზგასმით აღნიშნა მათი მუშაობისადმი ნდობა და განაცხადა, რომ მათზე ზეწოლას არ მოახდენს.
სააგენტო Reuters წერს, კიბერუსაფრთხობა ბაიდენის ადმინისტრაციის დღის წესრიგის სათავეში მოექცა მას შემდეგ, რაც მსხვილ ობიექტებზე, როგორიცაა კომპანიები, SolarWinds და Colonial Pipeline, ხორცის გადამამუშავებელი კომპანია JBS და პროგრამული ფირმა Kaseya, კიბერთავდასხმები მოხდა. ამის შედეგად აშშ-ის ზოგიერთ რეგიონში ენერგორესურსებისა და სურსათის მიწოდება შეფერხდა.
კომენტარები