სამოქალაქო აქტივისტი დავით ქაცარავა სოციალურ ქსელში ინფორმაციას ავრცელებს საოკუპაციო ხაზთან არსებულ ვითარებაზე:
„ჩემო მეგობრებო!არაერთხელ მისაუბრია ჩვენი ხელისუფლების მანკიერ მიდგომაზე, დაუმალოს საზოგადოებას ის რეალური ვითარება, რაც გვაქვს ოკუპაციის ხაზთან. მაგალითად, შარშან, 2019 წელს აქტივისტებმა და ჟურნალისტებმა საზოგადოებას მივაწოდეთ ინფორმაცია 57 გატაცებულის შესახებ, სინამდვილეში კი ბოლოს აღმოჩნდა, რომ საერთო რაოდენობამ 92 გატაცებული შეადგინა. ანუ ხელისუფლებამ შეგნებულად დაგვიმალა ინფორმაცია 35 გატაცებულის შესახებ. წელსაც ანალოგიურ მიდგომას შევეჩეხეთ – მთელი წლის განმავლობაში ჩვენ შევიტყვეთ მხოლოდ 12 გატაცების ამბავი. გატაცებების საერთო რაოდენობა კი 50 ს აღწევს, საბოლოო რიცხვი ჯერ არ გვაქვს.
მოგეხსენებათ, ცხინვალის ციხეში საქართველოს 2 მოქალაქე იმყოფება – გენადი ბესტაევი და ზაზა გახელაძე, რომელთა შესახებ საკმაოდ ბევრი ინფორმაცია მოგაწოდეთ ამ წლის განმავლობაში. მაგრამ როგორც აღმოჩნდა, აქაც გვატყუებს ჩვენი ხელისუფლება. ცხინვალის ციხეში უკვე 5 თვეა იმყოფება საქართველოს კიდევ ერთი მოქალაქე – ლაშა ხეთერელი, რომელსაც საოკუპაციო რეჟიმმა 1 წლიანი პატიმრობა მიუსაჯა.თუ რატომ დუმს ოჯახი ამის შესახებ, ეს ცალკე ისტორიაა, მაგრამ ის ფაქტი, რომ საქართველოს მოქალაქე ცხინვალის ციხეშია ამდენი ხნის განმავლობაში და ჩვენი ხელისუფლება არაფერს ამბობს და არც არაფერს აკეთებს ამ ადამიანის დასახსნელად, რას უნდა მივაწეროთ?საქართველოს მთავრობა დავიჯერო, არაფერი გსმენიათ 5 თვის წინ გატაცებულ ლაშა ხეთერელთან დაკავშირებით?“
კომენტარები