შემთხვევების რაოდენობის შედარებითი ზრდა შეზღუდვების მოხსნას არ უკავშირდება, იმიტომ რომ ეს ძირითადად არის ბოლნისელი ინფიცირებულების კონტაქტები, – ამის შესახებ ჟურნალისტებს ინფექციური საავადმყოფოს სამედიცინო დირექტორმა, მარინა ეზუგბაიამ განუცხადა.
„ქვეყნის მასშტაბით კოვიდ-ცენტრებში 238 პაციენტი მკურნალობს. ბოლო 24 საათში 18 ახალი შემთხვევა გვაქვს. აქედან 8 არის ბოლნისის მუნიციპალიტეტიდან. ძირითადად, ესაა სოფელი გეტა და სოფელი მუშევანი. კიდევ 8 უკვე დადასტურებული შემთხვევების კონტაქტებია და მხოლოდ 2 არის ახალი, საკარანტინო სივრციდან შემოსული. ჩვენს ცენტრში მხოლოდ 31 დადასტურებული შემთხვევაა, ერთი პაციენტი, რომელიც კრიტიკული იყო, ასეთად აღარ ითვლება, თუმცა ჟანგბადზე დამოკიდებულად რჩება. შემთხვევების რაოდენობის შედარებითი ზრდა შეზღუდვების მოხსნას არ უკავშირდება, იმიტომ რომ ეს ძირითადად არის ბოლნისელი ინფიცირებულების კონტაქტები. ამას შეზღუდვების მოხსნას ვერ დავუკავშირებთ, უბრალოდ ამ 2 პაციენტში გრძელდება კონტაქტების ძიება და დაავადების დიაგნოსტირება“, – განაცხადა ეზუგბაიამ.
საქართველოში კორონავირუსი 695 ადამიანს დაუდასტურდა, აქედან 425 უკვე გამოჯანმრთელდა, 12 პაციენტი კი გარდაიცვალა.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა.
კომენტარები