“ერთიანი ნაციონალური მოძრაობა” პარლამენტს მოუწოდებს, ოპოზიციური პარტიების მიერ ჩახსნილი პროპორციული სიების აღდგენა მოხდეს. ამ თემაზე საგანგებო ბრიფინგი ხატია დეკანოიძემ გამართა.
მისი თქმით, ოპოზიციურ პარტიებს ყველა მანდატი უნდა დაუბრუნდეს და ეს რეალურად იქნება ის პროპორცია რაც ხალხმა არჩევნებზე აჩვენა.
“იმისთვის, რომ საქართველოს პარლამენტში ყველა იმ პარტიას, რომელსაც აქვს ქართველი ხალხის მინიჭებული მანდატი, რომელიც დღეს უნდა ჩამოერთვას ივანიშვილის განკარგულებით, ბადრი ჯაფარიძეს და შალვა ნათელაშვილს, უნდა შეივსოს გახსნილი, პროპორციული სიებით, რომელიც რეალურად იქნება ის პროპორცია, რაც ქართველმა ხალხმა არჩევნებზე, გაყალბებული, ზეწოლით, მაგრამ მაინც არჩევნებზე მიანიჭა ამ პოლიტიკურ პარტიებს” – თქვა დეკანოიძემ.
დეკანოიძე ამბობს, რომ “ოცნებაში” ეშინიათ მიხეილ სააკაშვილის მიმართ არაადამიანურ მოპყრობასთან დაკავშირებული საგამოძიებო კომისიის შექმნის და სწორედ ამიტომ უჩერებენ მანდატებს ოპოზიციონერ დეპუტატებს.
“მინდა მივმართო “ქართულ ოცნებას” არავითარ შემთხვევაში საქართველოში ნებისმიერ ქალაქში ოპოზიცია არ შეწყვეტს ბრძოლას. მეტიც, ჩვენ გავძლიერდებით, გავაგრძელებთ მიხეილ სააკაშვილის წინააღმდეგ არაადამიანური მოპყრობის ფაქტების შემსწავლელ კომისიაზე მუშაობს, მუშაობას უკრაინელ კოლეგებთან, ჩავალთ იქ და მოვუყვებით ყველას, მათ შორის ბრიუსელში ვაპირებთ მიხეილ სააკაშვილზე სპეციალური მოსმენების ჩანიშვნას, იმისთვის, რომ მსოფლიომ გაიგოს რა რეჟიმი, პოლიტიკური მართლმსაჯულება არსებობს საქართველოში”,- თქვა ხატია დეკანოიძემ
ხატია დეკანოიძემ თქვა, რომ მათ საერთაშორისო პარტნიორებთან აქვს საუბარი, რომ ყველა მანდატი დაუბრუნეს ოპოზიციურ პარტიებს.
კომენტარები