ისრაელელი მეცნიერები აცხადებენ, რომ დღემდე ყველაზე დამაჯერებელი მტკიცებულება შეაგროვეს, რომ D ვიტამინის დონის მატებამ კოვიდპაციენტებს სერიოზული ავადმყოფობის ან სიკვდილის რისკის შემცირებაში შეიძლება დაეხმაროს.
ბარ ილანის უნივერსიტეტისა და გალილეის სამედიცინო ცენტრის მკვლევრები ამბობენ, რომ D ვიტამინს ისეთი ძლიერი გავლენა აქვს დაავადების სიმძიმეზე, რომ მათ შეუძლიათ პროგნოზი გააკეთონ, თუ როგორ იგრძნობენ თავს ადამიანები ინფიცირების შემთხვევაში, მხოლოდ მათი ასაკისა და D ვიტამინის დონის მიხედვით.
მეცნიერების განცხადებით, D ვიტამინის ნაკლებობა მნიშვნელოვნად ზრდის საფრთხის დონეს.
კვლევა ისრაელში კორონავირუსის პირველი ორი ტალღის დროს ჩატარებულ კვლევებს ეფუძნება და იმ პერიოდს მოიცავს, როდესაც ვაქცინები ხელმისაწვდომი არ იყო. ექიმებმა ხაზგასმით აღნიშნეს, რომ ვიტამინის დანამატები ვაქცინების შემცვლელი არ არის. ის იმუნიტეტის დონის დაცემის თავიდან აცილების საშუალებაა.
გალილეის სამედიცინო ცენტრის ექიმისა და ბარ ილანის უნივერსიტეტის მკვლევრის, ამიელ დრორის განცხადებით, D ვიტამინის ნაკლებობის შემთხვევაში, კორონავირუსის დაავადების მძიმე ფორმის განვითარების შანსი დიდია.
„რასაც ჩვენ ვხედავთ, როდესაც D ვიტამინი ადამიანებს კოვიდინფექციის შემთხვევაში ეხმარება, იმუნური სისტემის გაძლიერებასა და ვირუსულ პათოგენებთან გამკლავებაში მისი ეფექტურობის შედეგია“, – განაცხადა მან.
ისრაელისა და რამდენიმე სხვა ქვეყნის ჯანდაცვის ორგანოებმა რეკომენდაცია გაუწიეს D ვიტამინის დანამატებს კორონავირუსის საპასუხოდ, თუმცა მონაცემები მისი ეფექტურობის შესახებ აქამდე მწირი იყო.
კომენტარები