ლევან ჯავახიშვილი
„ალიას“ ესაუბრება ექსპერტი საგარეო საკითხებში, სოსო ცინცაძე.
– თქვენი და ბევრი სხვა ექსპერტის პროგნოზი მართლდება, რომ ომი დიდხანს გასტანს. რუსეთი უკრაინის ბოლომდე ამღები არ არის, უკრაინა კი დაკარგული ტერიტორიების დაბრუნებაზე ხელს არ აიღებს…
– კი, ომის დასრულების პირი ჯერ არ უჩანს, ისევ ვფიქრობ, გაგრძელდება, მაგრამ ახლო მომავალში არაფერია გამოსარიცხი. რუსეთი ითხოვს მოლაპარაკებას, ზელენსკი უარეზეა. ევროპელები ლაპარაკობენ, ეს ზელენსკი ჯორზე შეჯდა, მოლაპარაკებაზე არ მიდის, დაუჯდეს იმ პუტინს, გაიგოს მაინც რას სთავაზობსო. ახლა გავრცელდა კულუარულად ინფორმაცია, რომ ამერიკელები ზელენსკიზე ახდენენ ზეწოლას, ეუბნებიან, დასთანხმდი მოლაპარაკებებს, დაიწყეთ ეგ პროცესი თუნდაც ყველაზე დაბალი დონიდან. რუსეთის პირობებს ნუ დასთანხმდები, თუ საჭიროდ ჩათვლი და თუ უკრაინისთვის არახელსაყრელი პირობებს შემოგთავაზებენ, ჩაშალე მოლაპარაკებები, მაგრამ ისე ნუღარ გამოჩნდება, რომ მარტო შენ ხარ ომის მომხრეო. ეს წამგებიანი პოზიციაა ზელენსკისთვის, რადგან უკრაინელები ამას ცუდად გაუგებენ, მით უმეტეს, ხერსონის, ფაქტიურად, დაბრუნების მერე. თუმცა,შეიძლება წავიდეს ამაზე ზელენსკი და გარკვეული დროით საბრძოლო მოქმედებები შეჩერდეს.
ბოლოს, ერთ მნიშვნელოვან მოვლენაზე შევაჩერებ „ალიას“ მკითხველის ყურადღებას. ეგვიპტეში, კურორტ შარმ-ელ-შეიხში, გაერო-ს კლიმატის სამიტი გაიმართა, სადაც ჩვენი პრემიერიც გაემგზავრა. სამიტში 124 ქვეყნის მთავრობის მეთაური მონაწილეობს. ეს სამიტი, ორი რამით არის საყურადღებო. ერთი, რომ საკითხი იმას ეხება, ჩვენი პლანეტა იქნება თუ არა მომავალში საცხოვრებლად ვარგისი. თუ არაფერი შეიცვალა, პლანეტა საცხოვრებლად გამოუსადეგარი გახდება. კლიმატი კატასტროფული სიჩქარით იცვლება დედამიწაზე. 2015 წელს გაიმართა ანალოგიური სამიტი, სადაც 174 ქვეყანა მონაწილეობდა და მაშინ გადაწყდა, რომ 2030 წლამდე ტემპერატურის მატება 1.5 გრადუსს არ უნდა გადასცდენოდა და 2050 წლისთვის უნდა განულებულიყო. ცხადია, ყველა ქვეყანას უნდა გაეტარებინა შესაბამისი ღონისძიებები, რომ ამისთვის მიეღწიათ. თუმცა, უმეტესობამ ხელი არ გაანძრია და უარესად დააბინძურა გარემო. მაშინ ამ სამიტის გადაწყვეტილებას ხელი არ მოაწერა მსოფლიოს ორმა ყველაზე დიდმა დამაბინძურებელმა ქვეყანამ – ამერიკამ და ჩინეთმა. ახლა უკვე იცი, რამდენით მოიმატა ტემპერატურამ? 2, 5 გრადუსით. ეს კი იწვევს სტიქიურ მოვლენებს – ხანძრებს, ცუნამს, ქარიშხალს, აუტანელ სიცხეებს, რის გამოც ხალხი იხოცება.ეგვიპტესა და აფრიკაში თოვლი მოვიდა, მეტი რაღა გინდა? ევროპაში თბილი შემოდგომაა და უხარიათ, რა კარგია, ამ გაძვირებულ გაზს ცოტას დავხარჯავთო. ეკოლოგებმა კი განგაში ატეხეს, ეს სითბო სამომავლო კატასტროფის მომასწავებელიაო. სამიტის მეორე და სადღეისოდ საკითხი ის არის, რომ რუსეთ-უკრაინის ომმა ეკოლოგიურად უფრო სახიფათო გახადა მსოფლიოს კლიმატი და ეს გარემოს დაბინძურების საკითხია. რუსეთ-ევროპის ენერგეტიკულმა ომმა, ევროპას რუსულ გაზზე უარი ათქმევინა, ევროპელები იძულებულნი გახდნენ, გაეხსნათ დახურული შახტები და მაღაროები და დაეწყოთ ქვანახშირისა და სხვა წიაღისეული ენერგორესურსების მოპოვება, გაჩერებული ატომური სადგურების ამუშავება ასევე, ეს კიდევ უფრო დიდი საფრთხეა მსოფლიოსთვის. მოკლედ, მსოფლიოს წამყვანი ეკოლოგები, რუსეთ-უკრაინის ომის სასწრაფოდ შეწყვეტას ითხოვენ. მსოფლიო ეკოლოგიის კუთხით კიდევ უმრავი პრობლემა აქვს, მაგრამ არავინ ელოდა, რომ გაერო-ს კლიმატის სამიტიც კი რუსეთ-უკრაინის ომის კონტექსტში ჩაივლიდა.
კომენტარები