ჩრდილოეთ კორეის ხელისუფლებამ, ქვეყანაში კორონავირუსის გავრცელების თავიდან აცილების მიზნით, კატების და მტრედების მასობრივი განადგურების ბრძანება გასცა. ამის შესახებ გამოცემა The Mirror წერს.
გამოცემის ცნობით, კიმ ჩენ ინმა კატების და მტრედების ელიმინაცია ჩინეთის მოსაზღვრე დასახლებებში ბრძანა.
ჩრდილოეთ კორეის მთავრობა დარწმუნებულია, რომ კატებს და მტრედებს ვირუსის ჩინეთიდან შემოტანა შეუძლიათ. მათი მოსაზრება იმ ფაქტს ემყარება, რომ კატები თაგვებით იკვებებიან, ხოლო თაგვები შესაძლოა კორონავირუსის მატარებლები იყვნენ.
სტატიის ავტორი აღნიშნავს, რომ ამ გადაწყვეტილებას ყველა მოქალაქე არ ეთანხმება. მაგალითად, ქალაქ ხესანში ოჯახი 20 დღის განმავლობაში იზოლატორში მოათავსეს იმის გამო, რომ მათ შინაური კატა მოსაკლავად ვერ გაიმეტეს.
ოფიციალური მონაცემებით, ჩრდილოეთ კორეაში კორონავირუსის ინფექცია არ გამოვლენილა.
კომენტარები