ოზურგეთის მუნიციპალიტეტის სპორტულ გამაჯანსაღებელ დაწესებულებათა გაერთიანებიდან ორსულობის მუხლით გათავისუფლებული 64 წლის კაცი ამბობს, რომ მისი გაშვების მიზეზი პოლიტიკურია.
ხარიტონ ჩატარაშვილი შრომის კოდექსის 37-ე მუხლის პირველი პუნქტის საფუძველზე დაითხოვეს, რომელიც დასაქმებულის ორსულობისა და მშობიარობის გამო ანაზღაურებად შვებულებას გულისხმობს.
ხარიტონ ჩატარაშვილის განმარტებით დირექტორმა ოზურგეთის მერის, ავთანდილ თალაკვაძის ბრძანებით გაუშვა, რადგან თვითმმართველობის არჩევნებში თალაკვაძის კონკურენტს უჭერდა მხარს.
“პირადად ავთო თალაკვაძის გადაწყვეტილებაა ეს, არჩევნებში მხარს ვუჭერდი კოტე შარაშენიძეს, გაიმარჯვა ავთო თალაკვაძემ და გამოუცხადა დირექტორებს, რომ ეს კაცი არ დამანახოთ, გაათავისუფლეთ სამსახურიდან. 40 წელია ვმუშაობ ქართულ ფეხბურთში, არავითარი შენიშვნა, გაფრთხილება არ მქონია, ასე ერთპიროვნულად გადაწყვიტა, რომ ვინაიდან არ მიჭერდი მხარს არჩევნებში, წახვიდე უნდა სახლშიო.
შრომის კოდექსის ორგანული კანონის 37-ე მუხლი გულისხმობს მშობიარობას, ორსულობაში გასვლას და დღეების დამატებას და რა ვიცი, იცინის მთელი ოზურგეთი, ძალიან შეურაცხყოფილი ვარ”, – ამბობს ხარიტონ ჩატარაშვილი.
ცნობისთვის, გუშინ ადგილობრივმა გამოცემა “გურიის მოამბემ” გაავრცელა ბრძანებასაც, რომლის თანახმადაც ჩხატარაშვილი სამსახურიდან გაათავისუფლეს.
კომენტარები