იტალიაში დაკარგული ქართველი ემიგრანტი იპოვეს – ქალაქ ლეჩეში სამუშაოდ წასულ 40 წლის თემურ მოსაშვილს, რომელსაც ოჯახის ახლობლები და ნათესავები 20 ივნისიდან ეძებდნენ, ერთ-ერთ საავადმყოფოში მიაკვლიეს. მამაკაცი მკურნალობის კურსს გადის.
ამის შესახებ ინფორმაციას მოსაშვილის და ადასტურებს. თამარ მოსაშვილის თქმით, მისი ძმა ოჯახს სხვა ქართველი ემიგრანტების დახმარებით დაუკავშირდა და უთხრა, რომ ჯანმრთელობის პრობლემები აქვს და კლინიკაში მკურნალობს. მამაკაცმა ასევე თქვა, რომ საქართველოში პირველივე შესაძლებლობის შემთხვევაში დაბრუნდება.
თემურ მოსაშვილი წარმოშობით ქალაქ ლაგოდეხიდან არის და იტალიაში ორი თვის წინ წავიდა, თუმცა მას მუშაობა არ დაუწყია და ამ შუალედში ლეჩეში, ლტოლვილთა თავშესაფარში ცხოვრობდა. ოჯახის წევრების ინფორმაციით, ნერვიულობის ნიადაგზე მას ინსულტი განუვითარდა, საავადმყოფოშიც მოხვდა, თუმცა კლინიკა თვითნებურად დატოვა. სწორედ ამის შემდეგ ოჯახი მასთან კომუნიკაციას ვეღარ ახერხებდა. მათ დახმარებისთვის იტალიაში საქართველოს საკონსულოს მიმართეს.
კომენტარები