ირაკლი რუხაძე: ჩემი მთავარი პრეტენზია „ქართულ ოცნებასთან“ არის ის, რომ დღეს „ნაციონალური მოძრაობა“ ისევ არსებობს

ჩემი ყველაზე დიდი პრეტენზია „ქართულ ოცნებასთან“ მაქვს ის, რომ არ გაშუქდა და არ გამოვიდა სააშკარაოზე რა მოხდა წინა 9 წლის განმავლობაში. ამან გამოიწვია ბევრი რამ, მათ შორის ის, რომ ასეთი ტელევიზიები არსებობენ დღეს ამ ფორმით და ჩვენც ასე გვიწევს არსებობა, რომ მათ შევეწინააღმდეგოთ, – ამის შესახებ თოქ შოუში „არჩევნები 2021“ ტელეკომპანია „იმედის“ დამფუძნებელმა, ირაკლი რუხაძემ განაცხადა.

„ამან გამოიწვია ისიც, რომ „ნაციონალური მოძრაობა“ არსებობს დღეს. წარმოუდგენლად შელახა ადამიანის უფლებები ამ პარტიამ [„ნაციონალური მოძრაობა]. ეს არის „ქართული ოცნების“ ბრალი. ისინი ამას ხსნიან, რომ ამერიკელებმა უთხრეს ასე და ა.შ. არ აქვს მნიშვნელობა, არ უნდა ჩარიო შენი ქვეყნის საქმეში სხვა ქვეყანა. ჩვენ, ასეთი გახლეჩილი საზოგადოება, სადაც არცერთ თემაზე ლაპარაკი არ შეიძლება, კოვიდით დაწყებული, რუსეთი, ნატო. საზოგადოება არის აბსოლუტურად გახლეჩილი. ეს გახლეჩილობა იმის ბრალია, რომ ჩვენ არ ჩავიხედეთ შიგნით და არ ვნახეთ რა მოხდა და არ გამოვიძიეთ. ჩვენ რომ ეს პროცესი გაგვევლო, დღეს „ნაციონალური მოძრაობა“ არ გვეყოლებოდა. „ნაციონალური მოძრაობაა“ ამ ქვეყნისთვის ძალიან საშიშია და რადგან ის არსებობს, ეს არის ჩემი მთავარი პრეტენზია „ქართულ ოცნებასთან. ახლაც არ არის გვიანი, რომ ეს გააკეთონ“, – განაცხადა ირაკლი რუხაძემ.