ჰოლივუდის კინოოპერატორები გადასაღებ მოედანზე ნამდვილი ცეცხლსასროლი იარაღის გამოყენების აკრძალვას ითხოვენ. ინიციატივა 214-მა კინოოპერატორმა გააჟღერა მას შემდეგ, რაც ფილმის “ჟანგი” გადაღებებზე უბედური შემთხვევის შედეგად ოპერატორი ჰალინა ჰატჩინსი გარდაიცვალა. ინფორმაციას Variety ავრცელებს.
ხელმომწერები, რომელთა შორისაა გრეგ ფრეიზერი (“დიუნი”), რეიჩელ მორისონი (“შავი პანტერა”), მენდი უოკერი (“მულანი”), მოუწოდებენ პროფკავშირების ლიდერებს, პროდიუსერებს და კანონმდებლებს, მხარი დაუჭირონ ამ ინიციატივას.
მანამდე კალიფორნიის სენატორმა დეივ კორტეზემ განაცხადა, რომ ფილმების გადაღების დროს ნამდვილი ცეცხლსასროლი იარაღის და ცოცხალი საბრძოლო მასალის გამოყენებას აკრძალავდა. ნიუ-მექსიკოს გუბერნატორმა მიშელ ლუჯან გრიშემმა კი ხაზი გაუსვა, რომ თუ ასეთ აკრძალვას გასართობი ინდუსტრია არ მიიღებს, მაშინ ამას შტატი გააკეთებს.
შეგახსენებთ, 22 ოქტომბერს დილით, მედიაში გავრცელდა ინფორმაცია, რომ მსახიობმა ალეკ ბოლდუინმა, ფილმის გადაღებების რეპეტიცაზე სარეკვიზიტო ცეცხლსასროლი იარაღიდან გაისროლა, რის შედეგად ოპერატორი ქალი დაიღუპა. გარდაცვლილია 42 წლის უკრაინული წარმოშობის ოპერატორი, ჰალინა ჰატჩინსი.
ამასთან, დაჭრილია ფილმის რეჟისორიც. ჯოელ სოუსა, რომელსაც ალეკ ბოლდუინის საბედისწერო გასწოლის შედეგად, მხარში ტყვიის ნამსხვრევი მოხდა, საავადმყოფოდან მალევე გაწერეს.
პოლიციამ ბოლდუინი დაკითხა და დაუყოვნებლივ გაათავისუფლა. ჯერ-ჯერობით უცნობია, წაუყენებენ თუ არა მას ბრალს.
კომენტარები