გიორგი ჩიკვაიძის დედა, ეკა წერეთელი სპეციალური პენიტენციური სამსახურის მიერ გავრცელებულ კადრებს ეხმიანება და წერს, რომ ბიზნესმენმა შიმშილობა 23 სექტემბერს დაიწყო, უწყებამ კი 20-22 სექტემბრის კადრები გამოაქვეყნა.
პენიტენციური სამსახური – ვასაჯაროვებთ ჩიკვაიძის საკანში გადაღებულ კადრებს
უწყებამ რამდენიმე საათის წინ დაწერა, რომ ვიდეომასალა მოიცავს 2025 წლის 20-22 სექტემბრის ეპიზოდებს, სადაც ჩანს, დღის განმავლობაში რამდენიმეჯერ როგორ იღებს მსჯავრდებული თავის თანამესაკნეებთან ერთად საკვებს როგორც ბრალდებულ/მსჯავრდებულთა კვების რაციონით გათვალისწინებულს, ისე პენიტენციური დაწესებულების ტერიტორიაზე არსებულ მაღაზიაში შეძენილს.
აღსანიშნავია, რომ ცნობა ბიზნესმენის მიერ შიმშილობის გამოცხადების შესახებ 23 სექტემბერს, ეკა წერეთელმა საკუთარ facebook-ზე გაავრცელა.
ეკა წერეთელი დღეს გამოქვეყნებულ წერილში წერს, რომ ხელთ აქვს 26 სექტემბერს ჩატარებული ციხის ლაბორატორიული კვლევები, რომლის მიხედვითაც მის შვილს დაწყებული აქვს თირკმლის და ღვიძლის უკმარისობა.
“უსუსურებო… გიორგის კადრები, რომ გაავრცელეთ 22 სექტემბრის რიცხვით… ადამიანმა შიმშილობა დაიწყო 23 სექტემბრის დილი 9:00 საათზე და ხელთ მაქვს უკვე 26-ში თქვენი ციხის ლაბორატორიული კვლევები, დაწყებულია თირკმლის და ღვიძლის უკმარისობა. მზად ვარ ეს ანალიზებიც გავასაჯაროოო… მართლა, რა უსუსურები და მატყუარები ხართ. ვინმე ჭკვიან ადამიანს მაინც დაეკითხეთ…” – წერს ეკა წერეთელი.
ცნობისთვის, გიორგი ჩიკვაიძე მიმდინარე წლის მარტში დააკავეს. “ბიზნესმენს პროკურატურა ედავებოდა სისხლის სამართლის კოდექსის 182-ე მუხლით გათვალისწინებული დანაშაულის ჩადენას, რაც მითვისება-გაფლანგვას გულისხმობს.
კომენტარები