ერთი თვის თავზე რაც საგანგებო მდგომარეობა მოქმედებს კვლავ არაა წარმოდგენილი ანტიკრიზისული გეგმა. ჩვენი მოქალაქეები არიან სრულ გაურკვევლობაში თუ რას აპირებს მთავრობა მათთან მიმართებით, – ამის შესახებ „ევროპული საქართველოს“ წევრმა, დეპუტატმა ოთარ კახიძემ პარლამენტში ბიუროს სხდომაზე განაცხადა.
„საგანგებო მდგომარეობის გამოცხადებისას „ევროპულმა საქართველომ“ მხარი დაუჭირა ამ ინიციატივას. ლეგიტიმური იყო ეს მოთხოვნა. თუმცა, ჩვენ მაშინაც დავსვით საკითხი, უმძიმეს მდგომარეობაში ჩავარდნილი ჩვენი ეკონომიკისთვის, ათიათასობით ჩვენი მოქალაქისთვის, რომლებმაც სამსახური დაკარგეს და შემოსავლის გარეშე დარჩნენ, კონკრეტული გეგმა წარმოდგენილიყო, რას აპირებდა მთავრობა მათთან მიმართებით. პარალელურად ჩვენ წარმოვადგინეთ ჩვენი ვერსია ანტიკრიზისული გეგმის. ერთი თვის თავზე კვლავ არ არის წარმოდგენილი აღნიშნული გეგმა. კვლავ ჩვენი მოქალაქეები არიან სრულ გაურკვევლობაში რას აპირებს მთავრობა“, – აღნიშნა კახიძემ.
მისი თქმით, საგანგებო მდგომარეობამ აჩვენა სრულიად გაუაზრებელი შეზღუდვები: „მაგალითად, მანქანებით გადაადგილების აკრძალვა სრულიად გაუგებარი და აუხსნელი მიზეზებით, საკურიერო მომსახურებაც იზღუდება და ის მცირე მეწარმეებიც კი, რომლებმაც მოახერხეს და თავი გადაირჩინეს ამ მძიმე ვითარებაში, ახლა მთავრობა ყველაფერს აკეთებს რომ ისინი კიდევ უფრო გაკოტრდნენ”, – აღნიშნა კახიძემ.
საქართველოს პარლამენტი საგანგებო მდგომარეობის გაგრძელების მხარდაჭერაზე დღეს იმსჯელებს.
კომენტარები