„ხშირად მაძლევთ რაღაც ელემენტარულებზე შენიშვნას. გასაგებია, გაძევებაც არ არის პრობლემა, შეიძლება 5 წელი მომიწიოს სრულიად უსამართლოდ ციხეში ყოფნა და ახლა აქედან თუ გამაძევებენ, დიდი არაფერი მაგრამ, უნდა გესმოდეთ, რომ ძალიან რთულია ეს ჩვენთვის“, – ამ სიტყვებით მიმართა სინდისის პატიმარმა ონისე ცხადაძემ მოსამართლე ნინო გალუსტაშვილს, რომელმაც მანამდე არაერთხელ ახსენა, რომ ცხადაძეს გააძევებდა, თუმცა საბოლოოდ კიდევ ერთი შენიშვნა მისცა.
ცხადაძემ სასამართლოს კიდევ ერთხელ გაუმარტა, რომ არცერთი პირს დანაშაული არ ჩაუდენია და რასაც ედავებიან, სრულიად აბსურდულია.
„კიდევ ერთხელ და რამდენჯერაც მომეცემა საშუალება ბევრჯერ აგიხსნით, რომ არაფერი ეს არ არის, წეღან ვთქვი სასაცილოა-მეთქი, მაგრამ სასაცილოა ზედაპირულად, თუ არ ჩავუღრმავდებით, მაგრამ თუ ჩავუღრმავდებით, ჩვენ დავინახავთ ერთი და იგივე პროკურორებს აქაც, სხვაგანაც, მერე კიდე სხვაგანაც, ცალ-ცალკე, ერთად, ამ მოსამართლეს აქაც, სხვაგან, კიდევ სხვაგან და ერთი და იგივე შინაარსის საქმეებზე. ამას ხომ ვხედავთ აქ და იმ ყველაფერს მივდივართ მერე ვუყურებთ საკანში, ტელევიზორში, მერე ვბრუნდებით ისევ აქ და იგივე ხდება. მოდის ვიღაც მოწმე, უსვამენ კითხვას, არ სცემს კონკრეტულ პასუხს, მერე პროკურორი ეხმარება მას ფაქტობრივად პასუხის გაცემაში. როგორ წარმოგიდგენიათ ახლა თქვენ ან საერთოდ მინდა წარმოიდგინოთ, რომ აი ერთი წამით, აქედან რომ გახვალთ, დაფიქრდეთ და წარმოიდგინოთ, აი სახლში მიხვედით, მეორე დღე გათენდა და ეს რაღაც არ არსებობს, აი რა შეიცვალა სამყაროში, ამაზე მინდა რომ დაფიქრდეთ. ამაზე მინდა რომ დაფიქრდეთ, მძიმე, საშიში დამნაშავეები სხედან აქ თუ რა ხდება? ვინმეს რამეს ვუშავებთ?
ბოლოს ერთ რაღაცას ვიტყვი, აქ მოწმეც განაცხადა, რომ საზოგადოების მაღალი ინტერესია ამ საკითხზეო. ჩემი აზრით, მე მგონი მართალი ვარ ამაში, რომ საზოგადოების მაღალი ინტერესი იქნება ორ შემთხვევაში საქმეზე, როცა გყავს განსაკუთრებით მძიმე დანაშაულის ჩამდენი ადამიანები საბრალდებო სკამზე, ან როცა გყავს უდანაშაულო ადამიანები. ახლა თქვენ თვითონ გამოიკვლიეთ ჩვენი ბიოგრაფია, რა გაგვიკეთებია, ვინ ვართ, სად ვართ, მოგვიპარავს რამე ცხოვრებაში, ვინმე გვიცემია თუ რა გაგვიკეთებია, ეგ ყველაფერი გამოიძიეთ და მერე მიიღეთ დასკვნა. დანარჩენს, აქ არგუმენტებს, თუ გყავთ ეგეთი ვიღაცა სასწაული, მე ახლა ჩამსვამთ, კი ბატონო, მილიონჯერ მითქვამს, რომ არ მაქვს პრობლემა, უსამართლოც რომ იყო, არ მაქვს პრობლემა, უბრალოდ ძალიან რთულია ამის ატანა და ეს მინდა რომ გესმოდეთ“, – თქვა ცხადაძემ.
დაკავებულებს – ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კინაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.
აღნიშნული დანაშაული სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.
კომენტარები