სახალხო დამცველის მოადგილის გიორგი ბურჯანაძის ინფორმაციით, პენიტენციურ სამსახურს მიხეილ სააკაშვილის შიმშილობის სტატუსი არ შეუცვლია და მის ფორმად მითითებულია სრული შიმშილობა.
როგორც ბურჯანაძე განმარტავს, ომბუდსმენის აპარატმა მიხეილ სააკაშვილის შიმშილობის შესახებ ინფორმაცია იუსტიციის მინისტრის განცხადებამდე და განცხადების შემდეგ გადაამოწმა.
“ჩვენ გადავამოწმეთ ინფორმაცია პენიტენციურ დაწესებულებაში, როგორც იუსტიციის მინისტრის მიერ გავრცელებულ ინფორმაციამდე, ისე მის შემდეგ მიხეილ სააკაშვილის ოფიციალურ შიმშილობის ფორმად მიჩნეულია სრული შიმშილობის ფორმა, არაფერი ცვლილება ამ კუთხით არ არის განხორციელებული პენიტენციური სამსახურის მიერ. უშუალოდ სამედიცინო დეპარტამენტისა და პენიტენციური სამსახურის მიერ სხვა შეფასება კეთდება, სხვა შეფასება მოვისმინეთ პოლიტიკოსების მხრიდან. კადრები, რომლებიც ვრცელდება, გადაღებულია ნომერ მე-12 დაწესებულების სამედიცინო ოთახში. ეს არის ექიმის ოთახი, იმ ოთახში ჩვეულებრივად მიმდინარეობს სამედიცინო მანიპულაციები”, – ამბობს ბურჯანაძე.
მისივე თქმით, სახალხო დამცველის აპარატი შეისწავლის რამდენად ემსახურებოდა საჯარო ინტერესის დაკმაყოფილებას პენიტენციური სამსახურის მიერ, მიხეილ სააკაშვილის ყველაზე პირადი და ინტიმური ინფორმაციის გავრცელება.
კომენტარები