“ქართული ოცნების” ერთ-ერთი ლიდერი, არჩილ თალაკვაძე “მთავარი არხის” გენერალური დირექტორის, ნიკა გვარამიას მიერ გავრცელებულ კრებსებს ფეიკ ნიუსს უწოდებს და ამბობს, რომ იგივეს დაწერა ფურცელზე ნებისმიერ ადამიანს შეუძლია.
“სინამდვილეში ჩანაწერები არ არის, ეს არის ტექსტები, რომლებიც ნებისმიერ ადამიანს შეუძლია დაწერს, ნ.ჯ.-მ რა უთხრა, ნ.კ.-ს და გ.ნ-მ რა უთხრა ბ.ნ-ს ამის დაწერა შეუძლია ნებისმიერ ადამიანს ფურცელზე. მას შემდეგ, რაც ჩემი მეგობრების, თუნდაც ჩემი ოჯახის მიმართ ჩვენ ვნახეთ აბსოლუტური ყალბი დეზინფორმაციები და ფეიკ ნიუსები, არ უნდა გაგვიკვირდეს არც ეს. ჩვენ ამ ყველაფერს ვხვდებით მშვიდად, ვინაიდან ვიცით ვინ არის ნიკა გვარამია”, – თქვა არჩილ თალაკვაძემ.
დეპუტატი გია ვოლსკი კი ფიქრობს, რომ აღნიშნული ჩანაწერების გავრცელება “პროვოკაციის ხავსის შექმნის” მცდელობაა, რასაც ნიკა გვარამია ცდილობს თვითონვე ჩამოეკიდოს.
ცნობისთვის, პირველ აგვისტოს”მთავარი არხის” ეთერში, გადაცემაში “მთავარი აქცენტები”, ნიკა გვარამიამ სუს-ის სკანდალური ჩანაწერები გაასაჯაროვა. გვარამია ამბობს, რომ მასალა, რომელსაც ჰქვია ოპერატიული კრებსი პირადი ცხოვრება სუს (სუტ), 2020 წლის წინასაარჩევნო პერიოდშია ჩაწერილი.
მოპოვებული დოკუმენტებით ირკვევა, რომ სუს-ი უთვალთვალებდა, უსმენდა და უკანონო ჩანაწერებს აკეთებდა პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე და დიპლომატიური კორპუსის წარმომადგენლებზე. ჩანაწერების შინაარსი, რომელიც ნიკა გვარამიამ წაიკითხა არასამთავრობო ორგანიზაციების წარმომადგენლებმა დაადასტურეს.
კომენტარები