“ეს იყო წამლების საყიდი თანხა… მესამე წელია შვილის საფლავზე ვერ მივდივარ” – აფხაზეთში დაღუპული გმირის ოჯახს ფულადი დახმარება შეუწყვიტეს

აფხაზეთის ომის გმირის, გიორგი ციგროშვილის ოჯახს სახელმწიფომ ფულადი დახმარება შეუწყვიტა – გიორგის აღმზრდელი დედის თქმით, ფულადი დახმარების შეწყვეტა იმით აუხსნეს, რომ კანონი შეიცვალა და აღმოჩნდა, რომ თავად გამზრდელი დედა ვერ მიიღებდა თანხას. მას შვილად აყვანის დოკუმენტს სთხოვენ, რისი წარდგენის შესაძლებლობაც უკვე აღარ არსებობს.

გიორგი ომში ორჯერ წავიდა: თავდაპირველად 18 წლის ასაკში და მეორედ, როცა დაიჭრა და გამოჯანმრთელდა. როგორც მისი აღმზრდელი დედა ამბობს, ინფორმაცია ფულადი დახმარების შეწყვეტის შესახებ ირაკლი ღარიბაშვილსაც მიაწოდეს, როცა პრემიერმინისტრის პოსტს იკავებდა, თუმცა, ოჯახისთვის თანადგომა მან მხოლოდ მისალოცი ბარათით გამოხატა.

“მანამდე დედა ვიყავი და არა გამზრდელი, მაგრამ ჩემი მეუღლის გარდაცვალების შემდეგ აღარც დედა ვარ და აღარც გამზრდელი… ეს იყო ჩვენი შემოსავალი, ეს რომ მქონოდა, მე მექნებოდა საშუალება, მეყიდა წამლები… მესამე წელია, შვილის საფლავზე ვერ მივდივარ”, – ამბობს გიორგის გამზრდელი დედა.

აღსანიშნავია, რომ სასამართლომ არც ის გაითვალისწინა, რომ გიორგი ციგროშვილს შშმ პირი ძმა ჰყავს, რომელსაც განსაკუთრებული ყურადღება სჭირდება. ოჯახის ადვოკატი, დავით ახალაური კი აცხადებს, რომ ტერიტორიული მთლიანობისათვის დაღუპული მებრძოლის ოჯახი სახელმწიფომ, უბრალოდ, დაივიწყა.

ცნობისთვის, თელაველი გიორგი ციგროშვილი რუსეთ-საქართველოს ომის აფხაზეთის მონაკვეთის პერიოდში, 1993 წელს, საჰაერო იერიშის შედეგად დაიღუპა, როცა თვითმფრინავით თბილისში დაჭრილები გადაჰყავდათ.

წყარო: ნიუპოსტი