საქართველოში საპარლამენტო არჩევნების შემდეგ პროტესტის ტალღა არ წყდება. თითქმის ყოველდღიურად ეწყობა აქცია-პერფორმანსები.
კვირას დაანონსებულია მასშტაბური აქციები, რომელიც თბილისის ცენტრალურ ქუჩებში მოეწყობა.
ინფექციური საავადმყოფოს სამედიცინო დირექტორი, თენგიზ ცერცვაძე „პრაიმტაიმთან“ საუბრისას ამბობს:
„რა თქმა უნდა, გაცილებით უკეთესი იქნებოდა, ეს აქციები რომ არ ჩატარებულიყო, მაგრამ, ვინაიდან იმ პოლიტიკურ პროცესებს პრიორიტეტი აქვს მსოფლიოში და განსაკუთრებით, ჩვენს ქვეყანაში, ეს არჩევნები გამოდგა ისეთი, რომ ძალიან მაღალია პოლიტიკური აქტივობა და ამ პოლიტიკურ პროცესებს ალბათ, ვერც შევზღუდავთ.
რაც შეიძლება ვურჩიოთ და გულის ტკივილით გამოვთქვათ: ტარდება – ტარდება, მაგრამ კარგი იქნებოდა, რომ აქცია-შეკრებები არ ჩატარდეს, ყველაფერი გადაწყდეს მოლაპარაკების მაგიდასთან, ან სამართლებრივი გზით, მაგრამ რეალურად, ამ ეტაპზე ეს შესაძლებელი არ არის.
ერთი თხოვნა მაქვს – აქცია ხომ შეიძლება ჩატარდეს უსაფრთხოების რეგულაციის წესების დაცვით? ყველამ რომ პირბადე გაიკეთოს, ეს რას აკლებს ან პოზიციას, ან ოპოზიციას? ამით პროტესტს ნაკლები ძალა ხომ არ ექნება?
ნიღბის გაკეთება აქციას ხომ არ აუფასურებს და არც პროტესტის ძალას? უცხოელების თვალში ნიღბის არ ტარება პროტესტის ძალაზე კი არა, უპასუხისმგებლობაზე მიუთითებს. ევროპის ქვეყნებში ქუჩაში უპირბადოდ სიარული 200-300 ევროთი ისჯება.
მთავრობა ოპოზიციის აქციაში ვერ ჩაერევა, თავად ორგანიზატორებმა უნდა უზრუნველყონ როგორც პირბადის ტარება, ასევე სოციალური დისტანციის დაცვა. მოაწყონ აქცია უფრო დიდ სივრცეებში. მაგალითად, რიყეზე, იპოდრომზე. კი ბატონო, მოაწყონ ცენტრალურ ადგილებში, რუსთაველზე, მაგრამ იქაც შეიძლება დისტანციის დაცვა…
თუ ეს ყველაფერი არ გაითვალისწინეს, გამართლდება ის პროგნოზი, რასაც დაავადებათა კონტროლის ცენტრი აცხადებდა. ნოემბრის შუიდან ბოლომდე ინფიცირებულთა რიცხვი დღეში 3-4 000-ს მიაღწევს და ამით კლინიკური სექტორი მეტად დაიტვირთება.
ამერიკამ, ინგლისმა, გერმანიამ, საფრანგეთმა ვერ გაუძლო გადატვირთვებს. საქართველო უძლებს და კიდევ გაუძლებს, მაგრამ უსასრულო არაფერია. შემდეგ სამედიცინო სერვისების მიწოდება შეიზღუდება, სიკვდილობა გაიზრდება“
შეგახსენებთ, ვიცე-პრემიერმა მაია ცქიტიშვილმა გუშინ განაცხადა, რომ მთავრობა მსჯელობს საღამოს და ღამის საათებში გადაადგილების შეზღუდვაზე.
კახა კალაძემ კი თქვა, რომ შესაძლოა, მეორე ტურამდე კომენდანტის საათი გამოცხადდეს. აქვე შეგახსენებთ “ალიას” მკითხველს იმასაც, რომ კომენდანტის საათს საგანგებო მდგომარეობის გამოცხადების გარეშე ვერ დააწესებენ და საგანგებო მდგომარეობის დროს, ვერ ჩატარდება მეორე ტური, სწორედ ამიტომაც შეიტანეს ცვლილება ჯანმრთელობის შესახებ კანონში, რომლის მიხედვითაც, შეუძლიათ სხვა სახელით დააწესონ კომენდანტის საათია, ისე, როგორც ვიცე-პრემიერმა ბრძანა – გადაადგილების შეზღუდვა საღამოს და ღამის საათებში.
კომენტარები