ლევან ჯავახიშვილი
„ალიას“ ესაუბრება საერთაშორისო ურთიერთობების ექსპერტი, სოსო ცინცაძე.
– ამერიკა საქართველოში ახალ ელჩს აგზავნის, რობინ დანიგენს. „ქართული ოცნებისა“ და მისი დანამატის, „ხალხის ძალის“ მომხრეები სთვლიან, რომ კელი დეგნანი სწორედ მათი სისტემატური კრიტიკისა და შეტევების გამო გაიწვიეს – ამერიკამ ანგარიში გაგვიწიაო. სინამდვილეში რა მოხდა?
– ვინც მაგას ამბობს, ერთი წიგნი მაინც აქვს წაკითხული დიმლომატიაზე? დიპლომატიის საფუძვლებს მაინც იცნობენ? დარწმუნებული ვარ, რა არის დიპლომატია, ისიც არ იციან. კელი დეგნანი ამერიკის პირველი ელჩია საქართველოში, ვისაც ვადაზე ადრე უწყვეტენ უფლებამოსილებას? ცხადია, არა. საქართველოში ამერიკის ელჩების უმეტესობას, ოთხ წლიანი ვადის გასვლამდე შეუწყვიტეს უფლებამოსილება და იმ ელჩების მიმართ, არავის არანაირი პრეტენზია არ ჰქონია. ტყუილად იბრალებს, ვინც იბრალებს, რომ კელი დეგნანის გაწვევა მისი დამსახურებაა ან ამაში იოტისოდენა წვლილი აქვს შეტანილი. ელჩს, ამ შემთხვევაში კელი დეგნანს, ბევრს არაფერს ეკითხებიან. არც ერთი ჩინოვნიკი არ არის შეზღუდული ისე უფლებებში, როგორც ელჩი. დეგნანს ჰყავს კურატორი სახელმწიფო დეპარტამენტში, რომელიც მუდმივ კონტაქტზეა მასთან და კონკრეტულ დავალებებს აძლევს. დეგნანი ამ დავალებებს ასრულებს. ხშირ შემთხვევაში, მას მოსდიოდა კონკრეტული მესიჯები, რომელთაც ახმოვანებდა. დეგნანის ყოველი სიტყვა, საქციელი, ეს არის ამერიკის სახელმწიფოს პოზიცია საქართველოსთან თუ იმ პროცესებთან მიმართებაში, რაც აქ ხდება. დეგნანის ხისტი რიტორიკა იყო ამერიკის რიტორიკა და დეგანის ნაცვლად პრეზიდენტ ჯო ბაიდენს რომ ელაპარაკა იმ საკითხებზე, რაზედაც დეგნანი ლაპარაკობდა, იმავეს იტყოდა, შესაძლოა, სხვა სიტყვებით, მაგრამ შინაარსი უცვლელი იქნებოდა. ვფიქრობ, ამერიკის სენატი დაამტკიცებს ელჩად რობინ დანიგენს და ვნახავთ, ისიც იმავე პოლიტიკას გაატარებს საქართველოში, როგორსაც დაუკვეთენ. მე რადიკალურ ცვლილებებს არ ველი. ელჩი რატომ შეცვლა ამერიკამ? ეს მხოლოდ ამერიკის პრეზიდენტმა და სახდეპარტამენტის ხელმძღვანელებმა იციან. ალბათ, შესაძლოა, ახალი ელჩი უკეთ გადაწყვეტს იმ ამოცანებს, რომელსაც მას დაუსახავენ, ვიდრე დეგნანი. შესაძლოა, დეგნანი უფრო მნიშვნლოვან სამსახურში სჭირდებათ და იმიტომ მიჰყავთ, დააწინაურონ კიდეც და რასაც დეგნანი კეთებდა, იმას ახალი ელჩიც წარმატებით გაუძღვება.
კომენტარები