ე.წ. თაღლითური ქოლცენტრების საქმეზე ბრალდებული ხუთი პირის მიმართ აღკვეთის ღონისძიების შეფარდების საკითხზე სასამართლო დღეს იმსჯელებს.
პროკურატურა ხუთივე პირის მიმართ აღკვეთ ღონისძიებად პატიმრობას ითხოვს. ბრალდებული ხუთი პირიდან სამი დაკავებულია, ორი კი მიმალვაში იმყოფება.
კერძოდ, მიმალვაში არიან ელდარ ბინიაშვილი და დავით თოდუა, რომლებიც, პროკურატურის ინფორმაციით, ქოლცენტრის არაოფიციალური მეწილეები და მმართველები იყვნენ.
პროკურატურის მტკიცებით, „მორგან ლიმიტედის“ სახელით მოქმედი თაღლითური ქოლცენტრის ერთ-ერთ ხელმძღვანელს დავით კეზერაშვილთან, მის დასთან და დის შვილთან მილიონ დოლარზე მეტი აქვს გადარიცხული იმ პერიოდში, როდესაც კომპანია ევროპული ქვეყნების მოქალაქეების თანხებს თაღლითურად ეუფლებოდა.
როგორც ერთ-ერთი დაკავებულის ადვოკატმა განაცხადა, ბრალდების მხარის შუამდგომლობას არ დაეთანხმებიან და არასაპატიმრო აღკვეთის ღონისძიებას მოითხოვენ.
ამავე საქმეზე სამართალდამცველებმა ორი კვირის წინ ექვსი ფიზიკური და ერთი იურიდიული პირი მისცეს პასუხისგებაში. საგამოძიებო უწყების ცნობით, დაზარალებულები გერმანიის, სლოვაკეთისა და სლოვენიის მოქალაქეები არიან. პროკურატურის ინფორმაციით, ევროპული ქვეყნების მოქალაქეებმა სამ მილიონ 170 000 ევროს ზიანი მიიღეს.
კომენტარები