„ძალიან კარგად ვუხდით ხელფასს… ძალიან კარგად. იღებენ ხელფასს ჩვეულებრივად“, – ამბობს შინაგან საქმეთა მინისტრი ვახტანგ გომელაური აშშ-ის მიერ სანქცირებულ თანამშრომლებზე, განსაკუთრებულ დავალებათა დეპარტამენტის უფრო ზვიად „ხარება“ ხარაზიშვილსა და მის მოადგილე მილერი ლაგაზაურზე.
ეს კომენტარი მან „ტვ პირველთან“ გააკეთა 3 ოქტომბერს, „ქართული ოცნების“ კლუბის პრეზენტაციაზე. სიუჟეტი 5 ოქტომბერს გავიდა ეთერში.
კითხვაზე, ნაღდი ფულის სახით იღებენ ხელფასს თუ არა, გომელაური ამბობს:
„არა, ხელფასი, ახლა… ბანკში მარტო „ვიზა“ ბარათებია? სხვა ბარათები არ არსებობს“?
მინისტრი არ აზუსტებს, რომელი ბანკი ემსახურება სანქცირებულ მაღალჩინოსნებს: „რა მნიშვნელობა აქვს? მე არ ვარ ვალდებული, ვიცოდე. ეგ არის ინდივიდუალური“.
შინაგან საქმეთა სამინისტრო არ ამბობს, რომელ საბანკო ანგარიშზე ჩაურიცხავს კუთვნილ ხელფასებს აშშ-ის მიერ სანქცირებულ მაღალჩინოსნებს.
შეერთებულმა შტატებმა საქართველოს ოთხ მოქალაქეს სანქციები 16 სექტემბერს დაუწესა. მათ შორის არიან პოლიციის მაღალჩინოსნებიც:
- ზვიად ხარაზიშვილი (“ხარება”) შსს-ს განსაკუთრებულ დავალებათა დეპარტამენტის დირექტორი;
- მილერი ლაგაზაური, „ხარებას“ მოადგილე.
ხარაზიშვილს, ბოლო დეკლარაციის თანახმად, 2024 წლის ივნისისთვის, სახელფასო ანგარიში აქვს „თიბისი ბანკში“.
პრემიერ-მინისტრმა ირაკლი კობახიძემ ბანკებს, სანქციების ნაცვლად, „საქართველოს კანონმდებლობისა და კონსტიტუციის“ დაცვისკენ მოუწოდა.
ეროვნულმა ბანკმა კი კომერციულ ბანკებს შეახსენა მმართველის, ნათია თურნავას ბრძანება, რომლის მიხედვითაც, საქართველოს მოქალაქეზე სანქციები ვრცელდება მხოლოდ „სასამართლოს გამამტყუნებელი განაჩენით“.
კომენტარები