ვასილი პისკარევი, რომელიც რუსეთის სახელმწიფო დუმაში იმ კომისიას ხელმძღვანელობს, რომელიც რუსეთის საქმეებში გარე ძალების ჩარევას იძიებს, გენერალურ პროკურატურას მიმართავს და თეთრ-ლურჯი-თეთრი დროშის აკრძალვას ითხოვს, როგორც ექსტრემისტული სიმბოლოსი. ამის შესახებ ინფორმაცია კომისიის ტელეგრამ არხზე ვრცელდება.
“უკრაინაში დემილიტარიზაციისა და დენაციფიკაციის სპეცოპერაციის დაწყების შემდეგ უფრო და უფრო პოპულარობას იხვეჭს ე.წ ალტერნატიული დროშა – თეთრ-ლურჯი-თეთრი, წითელი ფერის გარეშე. ნიშანდობლივია, რომ ეს დროშები შემჩნეული იყო ანტირუსულ მიტინგებზე ნიუ იორკში, თბილისში, ლონდონში, კრაკოვში და სხვა ჩვენთვის არამეგობრული ქვეყნების ქალაქებში. ამ დროშას იყენებენ და სოციალურ ქსელებში აქვეყნებენ ისეთი პირები, რომლებიც ჩართული არიან ექსტრემისტულ საქმიანობაში, რაც საშუალებას გვაძლევს ვისაუბროთ მისი გამოყენების და საჯარო დემონსტრირების აკრძალვის აუცილებლობაზე,”- აღნიშნა პისკარევმა.
გარდა ამისა, ვასილი პისკარევმა აღნიშნა, რომ სახელმწიფო დროშის შეურაცხყოფისთვის უკვე დაწესებულია სისხლის სამართლის პასუხისმგებლობა:
“დისკუსია იმის შესახებ, რომ თითქოს რუსეთს სჭირდება რამე სხვა დროშია, რომლისაც არ შერცხვებათ – ეს მორიგი გამოვლინებაა დასავლური მაიდანის ტექნოლოგიების. ჩვენ გვახსოვს, რომ ბელარუსში საპროტესტო აქციის მონაწილეები ასევე იყენებდნენ ალტერნატიულ დროშას, რომელიც გარეგნულად სხვათა შორის გავდა იმას, რომელსაც ახლა ცდილობენ რომ ჩვენ დაგვიწესონ, მხოლოდ ცენტრალური ზოლის ფერი განსხვავდებოდა. ისტორიულად თეთრ-ლურჯი-თეთრი დროშა არასოდეს ყოფილა რუსეთის სახელმწიფო სიმბოლოებს შორის, ეს არის მორიგი ფეიკი,” – განაცხადა კომისიის თავმჯდომარემ.
კომენტარები