CNN: “სამარცხვინო და არაეთიკური” – Heineken, Unilever, Philip Morris, Mondelez, Nestle, TGI Fridays – რა ექსკლუზიურ ინფორმაციას ავრცელებს მედია ცნობილ კომპანიებზე? – მასალის განახლება

მასალის განახლება: ტვ იმედი ავრცელებდა ინფორმაციას, რომლის მიხედვითაც, მსოფლიოს ათასზე მეტმა უმსხვილესმა კომპანიამ დაარღვია პირობა და რუსეთში ბიზნეს-საქმიანობას განაგრძობს. რეალურად კი, CNN-ის ექსკლუზიური ინფორმაციით, 1000-ზე მეტმა კომპანიამ პირობა შეასრულა და რუსული ბაზარი დატოვა, თუმცა, ზოგიერთმა ცნობილმა კორპორაციამ პირობა დაარღვია და ბიზნეს საქმიანობას რუსეთში კვლავ აგრძელებს.

იელის უნივერსიტეტის მკვლევართა მიერ CNN-სთვის მიცემულ ანგარიშში დასახელებულია ისეთი ცნობილი კომპანიები, როგორებიცაა „ჰეინეკენი“, „ფილიპ მორისი“, „უნილევერი“ და „ორეოს“ მწარმოებელი „მონდელესი“.

იელის მკვლევრები აცხადებენ, რომ აღნიშნული ფირმები ომის მიუხედავად, რუსეთში ფუნქციონირებენ და დიდ სარგებელს იღებენ.

მითების დეტექტორის ინფორმაციით: ჯეფ Ზონეფელდმა რუსეთში საქმიანობის შემწყვეტი/გამგრძელებელი კორპორაციების სიის შექმნა ომის დაწყებიდან რამდენიმე დღეში დაიწყო და ბაზა სწრაფი ტემპებით გაიზარდა. ინფორმაციის მისაღებად კვლევა იყენებს რუსეთში მყოფ სტუდენტებს, კომპანიების შიდა ინფორმატორებს, ადგილზე მყოფ ექსპერტებს, კორპორატიულ დოკუმენტებსა და მედიის გავრცელებულ ინფორმაციას. ბაზაში კომპანიები შეფასებულია 5 ქულიანი სისტემით, სადაც A ნიშნავს რუსული ბაზრის სრულად დატოვებას, F-კი საქმიანობის შეუზღუდავად გაგრძელებას. კვლევის მიხედვით, რუსეთში ბიზნესის სრულად ან ნაწილობრივ განხორციელებას აგრძელებს 400-ზე მეტი მსხვილი კომპანია, თუმცა უნდა აღინიშნოს, რომ მათ დიდ ნაწილს, განსაკუთრებით F კატეგორიაში, ჩინური კომპანიები წარმოადგენენ. ასევე მნიშვნელოვანია იმ ფაქტორის გათვალიწინება, რომ იელის ბაზაში შეტანილი კორპორაციების ნაწილს რუსეთში საქმიანობის შეწყვეტის დაპირება არც გაუცია.

გარდა იელის უნივერსიტეტის ინფორმაციის და CNN-ის სტატიისა, რომელსაც “იმედი” და ongo.ge ეყრდნობიან, “მითების დეტექტორმა” კიდევ ერთ ბაზას მიაკვლია, რომელიც კიევის ეკონომიკის ინსტიტუტმა შექმნა. ისინი იკვლევენ რუსეთში კომპანიების საქმიანობის შეწყვეტას ან/და გაგრძელებას ომის დაწყების შემდგომ. სია მოიცავს დაახლოებით 2000 კომპანიას, თუმცა მასში მსხვილ კორპორაციებთან ერთად უფრო პატარა ბიზნესებიცაა შეყვანილი. ბაზის მიხედვით, რუსეთში 1000-ზე მეტმა კომპანიამ სრულად ან ნაწილობრივ შეწყვიტა საქმიანობა, ხოლო 1000-ზე მეტი მუშაობას კვლავ აგრძელებს. თუმცა, ამ მონაცემების მიხედვითაც სულ რამდენიმე კომპანიაა ისეთი, რომელმაც განაცხადა ბიზნეს საქმიანობის შეწყვეტის შესახებ და პირობა არ შეასრულა.