ბათუმში, საცხოვრებელი კორპუსის ნგრევის ფაქტზე 3 პირი დააკავეს, მათ შორის არის ჩამონგრეული სადარბაზოს პირველ სართულზე მდებარე ბინის მეპატრონე.
გავრცელებული ინფორმაციით, ის შიდა სარემონტო სამუშაოებს ახორციელებდა, რამაც სავარაუდოდ გამოიწვია შენობის ნგრევა. ბინის დაკავებული მეპატრონის შესახებ მისი მეზობლები საუბრობენ.
“10 დღის წინ გავიცანი ბინის მეპატრონე, რომელმაც იყიდა 2 და 1 ოთახიანი ბინები. რას აკეთებდა არაფერი ჩანდა, მერიას ნებართვა არ ჰქონია გაცემული და ამიტომ, ყველაფერს მალულად აკეთებდა,”- აცხადებს კორპუსის ამხანაგობის თავმჯდომარე მიხეილ თურმანიძე.
8 ოქტომბერს ქალაქ ბათუმში საცხოვრებელი კორპუსის ნაწილი ჩამოინგრა, რის შედეგადაც 8 ადამიანი დაიღუპა, მათ შორის არის დედა და მისი 2 მცირეწლოვანი შვილი.შსს-მ ფაქტთან დაკავშირებით გამოძიება დაიწყო, რომლის ფარგლებში 3 ადამიანი დააკავა. ერთ-ერთი არის პირი, რომლის ბინაშიც მიმდინარეობდა რემონტი, დანარჩენი ორი კი მის მიერ დაქირავებული ხელოსანია. წინასწარი ინფორმაციით, კორპუსის ჩამონგრევა, სწორედ ერთ-ერთ ბინაში მიმდინარე სარემონტო სამუშაოებმა გამოიწვია.
კომენტარები