ბატონო მოსამართლევ, რა უნდა სპეციალური დანიშნულების რაზმს იქ, სადაც არის ნიკა მელია? ესებუას დასაჭერად არიან? არ გიჩნდებათ კითხვა? – რა ხდება პროცესზე?

ნიკა მელიას ადვოკატებმა, სასამართლო პროცესზე დააყენეს შუამდგომლობა მოსამართლე ნინო ჩახნაშვილის აცილების შესახებ, ახალი ფაქტობრივი გარემოების გამო.

ბექა ბასიალაი:

“ამ წუთისთვის, გვაქვს მოცემულობა, რომელიც იცის ამ დარბაზში მსხდომმა ნებისმიერმა ადამიანმა – ახლა მნიშვნელოვანია არა ის, რაც ხდება დარბაზში, არამედ რაც ხდება ნიკა მელიას გვერდით და ეს მნიშვნელოვანია ათასეულობით ადამიანისთვის, ვისთვისაც პოლიციასა და ოპოზიციას შორის დაპირისპირება, რასაც ახლა ხელისუფლება აკეთებს, ვისთვისაც, პოლიციის გამოყენება პოლიტიკური მიზნებისთვის, არის პრობლემა.

ბატონო მოსამართლევ, თუ არა წინასწარ დაწერილი სასამართლოს განჩინება, მაშინ რა უნდა სპეციალური დანიშნულების რაზმს იქ, სადაც არის ნიკა მელია.

ჩართეთ ნებისმიერი მედია საშუალება, დემონსტრაციულად ჩანს ასეულობით სპეცრაზმელი, ეპიკირებით წარმოდგენილი პირები. საღი აზრის ფარგლებში, მაქვს კითხვა, რა უნდა განსაკუთრებულ დავალებათა დეპარტამენტის წარმომადგენლებს იქ, სადაც იმყოფება პირი, ვის მიმართაც პატიმრობის საკითხი უნდა გადაწყვიტოთ თქვენ? ესებუაა ნაციონალური მოძრაობის ოფისში? ესებუას დასაჭერად არიან? რატომ არიან? არ გიჩნდებათ კითხვა?

თუ ჩვენ ვცდებით, ხომ არის ადამიანის უფლებათა ევროპული სასამართლოს მიერ დადგენილი სტანდარტი – რომ მართლმსაჯულება არამხოლოდ უნდა განხორციელდეს, არამედ აღქმული უნდა იყვნეს რომ მიუკერძოებლად და ობიექტურად განხორციელდა, ხომ თქვენთვის ცნობილია ეს გადაწყვეტილება? თუ ვცდებით ჩვენ, იმისთვის რომ ჩვენი აღქმის სიმცდარე იქნეს დანახული, გადადეთ გადაწყვეტილების მიღება და ვნახოთ რატომ იყო მობილიზებული ენმ-ის ოფისთან სპეცრაზმი და ხვალ საღამოს გამოაცხადეთ გადაწყვეტილება.”