,,არავინ ენდობა ჩვენს ჯანდაცვის სისტემას – კერძო მესაკუთრეებს, რომლებმაც საავადმყოფოები ფულის საბეჭდ მანქანებად გადააკეთეს“ – ლევან ლორთქიფანიძე

,,კავკასიის სახლის” წევრი, ლევან ლორთქიფანიძე:

,,ხშირად მეფიქრება კვალიფიციურ, ავტორიტეტულ და კეთილშობილ ქართველ ექიმებზე, რომლებიც თითქმის ორი წელია ებრძვიან პანდემიას.

ალბათ, მათ ყოველ დღე ურეკავენ ნათესავები, ახლობლები, ნაცნობები და უცნობები, თხოვენ კონსულტაციას, ეხვეწებიან ადგილის გამონახვას შედარებით ნორმალურ საავადმყოფოში. ექიმები გაჭირვებულთა ნაწილს ხელს უმართავენ, რიგ შემთხვევებში კი დასახმარებლად ძალა არ ჰყოფნით… დარწმუნებული ვარ, განიცდიან, როდესაც მოქალაქეთა დაკვალიანებას, შველას ვერ ახერხებენ.

არავინ ენდობა ჩვენს ჯანდაცვის სისტემას – კერძო მესაკუთრეებს, რომლებმაც საავადმყოფოები ფულის საბეჭდ მანქანებად გადააკეთეს, და სამინისტროს, რომელიც წლებია პრაქტიკულად მხოლოდ ბაზარს ექვემდებარება! ხალხს მხოლოდ ცალკეული ექიმების სჯერა და მათგან მოელის შველას!

ღმერთო, ყველა ადამიანს, რომელიც საავადმყოფოში ნორმალურ ადგილსა და კარგ ექიმს ეძებს, გზა გაუკვალე! კარგ ექიმებს კი ძალა მიეცი ბოლომდე გაუძლონ ამ უბედურებას.”