შინაგან საქმეთა სამინისტროს ინფორმაციით, თეთრიწყაროში დააკავეს არასრულწლოვნები, რომლებიც საცხოვრებელ სახლზე ყაჩაღურ თავდასხმას გეგმავდნენ. უწყებაში ამბობენ, რომ პოლიციის რეაგირების გამო, მათ ეს ვერ შეძლეს. დაკავებულია ორი არასრულწლოვანი, ორივე 2004 წელს დაბადებული.
“პოლიციამ ორივე მათგანი თეთრიწყაროში იმ დროს დააკავა, როდესაც ისინი სახლზე თავდასხმას აპირებდნენ. სამართალდამცველებმა, დაკავებულების პირადი ჩხრეკის შედეგად, ნივთმტკიცების სახით ამოიღეს: დანაშაულის ჩასადენად მომზადებული ნიღბები, ხელთათმანები, ასევე, გადაჭრილი თოფი 2 საბრძოლო ვაზნით და გადაკეთებული აირის პისტოლეტი”, — აცხადებენ შსს-ში.
დანაშაული 4-დან 12 წლამდე ვადით თავისუფლების აღკვეთას ითვალისწინებს.
უწყების ინფორმაციით, გამოძიება საქართველოს სისხლის სამართლის კოდექსის 18-179-ე მუხლის მე-2 ნაწილის და მე-3 ნაწილის “ბ” ქვეპუნქტებით, ასევე, 236-ე მუხლის მე-3 და მე-4 ნაწილებით მიმდინარეობს, რაც ბინაში უკანონო შეღწევით ყაჩაღობის ჯგუფურად მომზადებისა და ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.
კომენტარები