ავსტრალიის მოქალაქე, შანე ბრუკის მკვლელობის საქმეზე დაკავებული, რაფაელ მურსაკულოვი “ქართული ოცნების” მხარდამჭერია, ის ხელისუფლების ღონისძიებებში აქტიურად მონაწილებდა და მათ შორის ჩართული იყო კოვიდდახმარების პროექტში, რომელიც თბილისის მერიის მხარდაჭერით ხორციელდებოდა. მას მმართველი პარტიის წევრთან, ირაკლი ზარქუასთან ფოტოც აქვს გადაღებული.
23 აგვისტომდე მურსაკულოვი მთაწმინდის მე-5 საუბნო საარჩევნო კომისიის წევრიც იყო. აგვისტოში უფლებამოსილების შეწყვეტის მოთხოვნით მან საოლქო კომისიასაც მიმართა, რის შემდეგაც თავმჯდომარე გიორგი ზირაქაშვილმა გამოსცა განკარგულება, რომ მურსაკულოვს უფლებამოსილება პირადი განცხადების საფუძველზე შეუწყდა.
ზირაქაშვილი “მთავართან” საუბარში ამ ინფორმაციას ადასტურებს, თუმცა ამბობს, რომ მურსაკულოვს არც პირადად იცნობს და არც ის იცის რა მიზეზით დატოვა მან საარჩევნო კომისია.
“ვინც დააკავა შინაგან საქმეთა სამინისტრომ ეტყობა გარკვეული მტკიცებულება აქვთ, არ ვიცი ვინ არის, ფოტოზე რომ ვნახო შეიძლება ვიცნო ან გამახსენდეს ვინ არის, ასე არ მახსენდება. არ აქვს მნიშვნელობა ჩვენი აქტივისტი იქნება, ჩვენი პარტიის წევრი იქნება, თუ საკუთარი ახლობელ-ბიძაშვილი, ის ვინც ჩაიდენს დანაშაულს საქართველოს კანონმდებლობით უნდა გასამართლეს”, – თქვა ირაკლი ზარქუამ.
33 წლის კაცი სამართალდამცველებმა მოსამართლის განჩინების საფუძველზე 8 სექტებმერს აიყვანეს. გამოძიების ინფორმაციით, მურსაკულოვის კვალი მისი დნმ-ის პროფილის ექსპერტიზის შედეგად გამოიკვეთა. ამოღებულია დანაშაულის იარაღი – დანა.
„მთავარი“
კომენტარები