,, აი მაგალითად, სწორედ უცხოური ფონდების დახმარებით პირადად მე, ჩემი ორგანიზაციებით და ჩემი გუნდით შევძელი” – მარიკა არევაძის ჩამონათვალი

უფლებადამცველი მარიკა არევაძე:

“უცხოური გავლენის აგენტის” შესახებ კანონპროექტს მინდა შევეხო და ადამიანური ენით ავხსნა, რა გავლენას მოახდენს ეს ადამიანებზე და რატომ არის მავნებლობა.

თავდაპირველად სულ, რომ გვერდით გადავდოთ საერთაშორისო ორგანიზაციების შეფასებები და რუსული მიზნები ამ კანონპროექტში, ჯერ მინდა მარტივად მოგიყვეთ რა დააკლდება ხალხს ამ კანონპროექტის კანონად ქცევით.

აი მაგალითად, სწორედ უცხოური ფონდების დახმარებით პირადად მე, ჩემი ორგანიზაციებით და ჩემი გუნდით შევძელი:
– პანდემიის პერიოდში ასობით ადამიანისათვის ინდივიდუალურ დონეზე იურიდიული მომსახურების მიწოდება. აღსრულებების გაჩერება, საქმეების შეჩერება, მორიგებები, პირგასამტეხლოების მინიმუმამდე შემცირება, საპენსიო სესხებზე არათანაზომიერად დარიცხული სარგებლისა თუ გაზრდილი ძირი თანხების შემცირება. ეს ყველაფერი ამ ასეულობით ადამიანისათვის იყო უფასო, ვინაიდან ფინანსები გაიღო უცხოურმა ფონდმა. ეს ასეულობით ადამიანი ამას ვერ შეძლებდა ამ ფონდის დახმარების გარეშე ვინაიდან არ ექნობოდა იურიდიული მომსახურებისათვის საკმარისი მატერიალური შესაძლებლობა;
– უკრაინა რუსეთის ომის პერიოდში, სწორედ უცხოური ფონდების დახმარებით შევძელით ომით დაზარალებული ქალების კლუბის შექმნა, ათობით ქალს ვამზადებთ ხელობებში, რომ შეძლონ და შეიქმნან საკუთარი შემოსავლის წყარო; უახლოეს პერიოდში ქართული ენის სწავლებას შევძლებთ 100მდე უკრაინელისათვის; სხვადასხვა ხელობის შესწავლას და მცირე მეწარმეობის ხელშეწყობას ვგეგმავთ ქართველი ომით დაზარალებული ქალებისათვის.

ეს ყველაფერი (და ეს მხოლოდ მცირე მაგალითებია) შესაძლებელი გახდა მხოლოდ და მხოლოდ უცხოური ფონდების დახმარებით. წარმოიდგინეთ რამდენი არასამთავრობო ორგანიზაციაა და რამდენი კარგი საქმე კეთდება, მაგალითად შშმ პირებისათვის შესაბამისი დახმარებების აღმოჩენა, ბავშვების დახმარება, უფლებების დაცვა და სხვა. თავად სახელმწიფოც ბევრ რამეს სწორედ ამ უცხოური ფონდების ფულით აკეთებს.

როგორც კი ეს კანონპროექტი გადაიქცევა კანონად, ეს ყველაფერი გაქრება – ანუ დაზარალდებიან სერვისის მიმღები ადამიანები, მოსახლეობა.

თავის მხრივ ეს კანონპროექტი ატარებს პოლიტიკურ მიზანს, რომელიც დამოუკიდებელი არასამთავრობო სექტორის გაქრობას ისახავს მიზნად, რომ ვეღარ მოხდეს ხელისუფლების კონტროლი.

ამიტომ, ძალიან მნიშვნელოვანია რომ საერთოდ შეწყდეს ამ კანონპროექტის განხილვა, ეს კანონპროექტი არაფრით არ უნდა გადაიქცეს კანონად. იმ შემთხვევაში კი თუ ის კანონის სახეს მიიღებს, არავინ არ უნდა დარეგისტრირდეს “აგენტად” და კანონი დარჩეს აღუსრულებელი. ამ კანონპროექტს არავითარი საერთო არ აქვს ქვეყნის და ხალხის ინტერესებთან და ეს კარგად უნდა გავიაზროთ.”