ეკატერინე ტიკარაძე: „ფაიზერის“ ვაქცინა გადანაწილდება სამ დიდ ქალაქში

საქართველოში „ფაიზერის“ ვაქცინა უკვე ჩამოვიდა, ჯანდაცვის მინისტრის განცხადებით, ვაქცინა 14 000 პირს მოხმარდება.

ეკატერინე ტიკარაძემ განმარტა, რომ „ასტრაზენეკათი“ ვაქცინაციისგან განსხვავებით, „ფაიზერის“ ვაქცინის მეორე დოზა უნდა გაკეთდეს 3-4 კვირის ინტერვალით, ამიტომ დღეს ქვეყანაში არსებული ვაქცინის რაოდენობა გადანაწილდება 14 000 ადამიანზე.

„დიდ ხანს ველოდეთ „ფაიზერის“ ვაქცინას და როგორც იქნა საქართველოშია, შემოვიდა უცვლელი – 29 500 დოზა. ეს დოზები იქნება გამოყენებული 14 000 პირისთვის.

იქედან გამომდინარე, რომ „ფაიზერით“ ვაქცინაციის პერიოდი განსაზღვრული არის პირველი ვაქცინის გაკეთებიდან 3-4 კვირაში მეორე დოზის გაკეთება, მივიღეთ გადაწყვეტილება, რომ ამ დოზების გაყოფა მოხდება და არ მოხდება მეორე ნაკადზე დალოდება, როგორც „ასტრაზენეკას“ შემთხვევაში მოხდა. შესაბამისად, რისკი არ შეექმნებათ ჩვენს მოქალაქეებს“, – განაცხადა მინისტრმა.

მისივე თქმით, ვაქცინა გადანაწილდება 3 ქალაქის 6 კლინიკაში. თბილისში – ბოკერიას კლინიკაში, რესპუბლიკური საავადმყოფოში, ამტელის კლინიკასა და კავკასიის მედიცინის ცენტრი.

ბათუმში – რესპუბლიკურ საავადმყოფოში, ხოლო ქუთაისში ცხაკაიას სახელობის ევექსის კლინიკაში.