ოკუპირებულ ტერიტორიაზე გარდაცვლილ დათა ვანიშვილს ხვალ დაკრძალავენ.
მავთულხლართების გამო ოჯახისთვის სამძიმრის თქმა თანასოფლელებსა და ხურვალეთში ჩასულებს შორიდან უწევთ. გამყოფ ხაზთან უსაფრთხოების მიზნით სამართალდამცველები არიან მობილიზებული. ვალია ვანიშვილმა თანაგრძნობისა და დახმარებისთვის ყველას მადლობა გადაუხადა. მისი თქმით, რადგან საფლავის გამზადება ვერ მოასწრეს, დათა ვანიშვილს ხვალ დაკრძალავენ.
„ჩამოვიდნენ ნათესავები. რუსებიც იყვნენ მოსულები და გვითხრეს თუ მოსვლა უნდა ვინმეს მოვიდესო. ყველა გვეხმარება, ქართველებიც და ოსებიც. ქართველებმა საკაცე და პროდუქტი გადმოგვაწოდეს, ოსური წინაგარადან ბიჭები იყვნენ მოსულები კიბე გაგვიკეთეს. შვილებმა მითხრეს ჩვენთან წამოდიო, რადგან მარტო დავრჩები ამის მერე აქ, მაგრამ არსად წავალ.
დათამ ხელზე მაკოცა და მითხრა როგორც მე არ დავტოვე სახლი და დავიცავიო, შენც არსად წახვიდეო, აი აქ, ფეჩთან იყავიო და ქართველები დაგეხმარებიანო“, – განაცხადა ვალია ვანიშვილმა.
დათა პაპა 88 წლის ასაკში გარდაიცვალა. მისი დაკრძალვის ხარჯებს გორის მუნიციპალიტეტის მერია გაიღებს.
დათა ვანიშვილის სახლი ოკუპირებულ ტერიტორიაზე 2012 წელს მოჰყვა, თუმცა მან სახლის დატოვებაზე უარი თქვა და მავთულხლართებს მიღმა მეუღლესთან ერთად დარჩა.
2014 წელს ის ოკუპანტებმა პენსიის ასაღებად ცენტრალური ხელისუფლების მიერ კონტროლირებად ტერიტორიაზე გადმოსვლის გამო დააკავეს.
კომენტარები