ვინ და რა საშუალებით გასცემდა ბრძანებებს 20 ივნისის ღამეს?
ოფიციალურ მასალებში მხოლოდ რაციების ჩანაწერები დევს, სადაც ისმის მოწოდება, რომ არ ისროლონ. თავის დროზე, გახარიამ თქვა, რომ არ არსებობს სხვა ჩანაწერები, თუმცა…
“ტვ პირველი” ავრცელებს ჩანაწერებს და ამტკიცებს, რომ სპეცრაზმი დავალებებს იღებდა მობილური ტელეფონით და არა რაციით. “ტვ პირველის” ინფორმაციით სუს-იდან გამოტანილია ვიდეოები, ჩანაწერები, ე.წ. აგენტების სია, სუსის ინფორმატორების სია.
“ტვ პირველის” ინფორმაციით, 20 ივნისის ღამეს კახა საბანაძე განსაკუთრებულ დავალებათა დეპარტამენტს ბრძანებას აძლევს, რომ დააზიანონ გახმოვანების მოწყობილობები აქციაზე:
“ეს არის ყველაზე კარგი შანსი დაზიანებისთვის, სწრაფად იმოქმედე – გაფრთხილების ხმები იკარგება და გაანეიტრალე. დასაზიანებელია, ოღონდ ტექნიკურად, რომ მერე აღდგენას დაექვემდებაროს. სხვა შანსი არ გვაქვს ახლა, თუ ეგ არ განეიტრალდა, მიმართულებას ვერ მივცემთ ხალხს. ისე დააზიანე, რომ მექანიკური დაზიანება არ ეტყობოდეს. იმოქმედე დროულად.”
ოფიციალური ჩანაწერების მიხედვით, ბრძანებები მხოლოდ რაციით გაიცემოდა. ჩანაწერების მიხედვით 23.36 საათზე საბანაძემ რაციაში ბრძანება გასცა, არ გამოყენებიათ რეზინის ტყვიები, პასუხი მხოლოდ 00.16 საათზე დაუბრუნეს მინისტრის მოადგილეს და უთხრეს, რომ არ ისროდნენ, თუმცა, ამ დროს ყველანი ვხედავდით, რომ სროლა გრძელდებოდა. რაც, “ტვ პირველის” მტკიცებით, იმას მოწმობს, რომ შესაძლოა, რაციის გარდა, მათ კომუნიკაცია ტელეფონითაც ჰქონდათ.
“ალია” შეგახსენებთ იმასაც, რომ ჩვენი და პრინციპში, სხვა ნებისმიერი მედიის ინფორმაციით, საბანაძე გახარიას კადრია, შესაბამისად, იმის მტკიცება, რომ საბანაძე ბრძანებებს გახარიასთან შეუთანხმებლად გასცემდა – არ იქნება დამაჯერებელი, მით უფრო, რომ 20 ივნისის ღამის შემდეგ, გიორგი გახარია დააწინაურეს…
კომენტარები