რა გადაზღვევა გააკეთა ჯანდაცვამ ექთნის გარდაცვალების შემდეგ და სად აიკრძალა ვაქცინაცია? – თამარ გაბუნია

ჯანდაცვის მინისტრის მოადგილემ, თამარ გაბუნიამ „იმედის დღეში“ განაცხადა:

“ის, რომ ანაფილაქსიური მაჩვენებლები ფიქსირდებოდა, ამის შესახებ ვაქცინის გვერდით მოვლენებში აქამდეც მითითებული იყო. სამწუხაროა, რომ ჩვენ ძალიან ადრე და ერთ-ერთი პირველები მოვხვდით ამ ანაფილაქსიური რეაქციების სიაში და გამოსავალიც ასეთი ცუდი მივიღეთ

ქვეყანას აქვს მოულოდნელი გვერდითი რეაქციების მართვის შესაძლებლობა და ჩვენ ასევე გუშინ მივიღეთ გადაწყვეტილება, რომ ვაქცინაცია გაგრძელდეს კონცეტრირებულად მრავალპროფილურ სტაციონარებში. გუშინდელი შემთხვევაც კლინიკაში მოხდა, ერთი წუთიც არ დაგვიკარგავს არც ტრანსპორტირებაზე და არც იმაზე, რომ პაციენტს დროულად მიეღო შესაბამისი დახმარება. სადაც იმუნიზაცია ტარდება, ყველა კაბინეტი აღჭურვილია შოკის მართვის შესაძლებლობებით. როდესაც ეს ამბულატორიაში ხდება, გარკვეული დრო შეიძლება დაიკარგოს ტრანსპორტირებაზე, მაგრამ როდესაც სტაციონარში ხდება, რაც გუშინ მოხდა, ამ შემთხვევაში არცერთი წუთი არ დაკარგულა.

სამომავლოდ რომ გადაზღვეულები ვიყოთ, სადმე დრო რომ არ დაიკარგოს, გვირჩევნია ეს ყველაფერი გაგრძელდეს მულტიპროფილურ სტაციონარებში, სადაც იქვე არის რეანიმაციული განყოფილება“

ეს გადაწყვეტილება რატომ მივიღეთ მხოლოდ ახლა, მხოლოდ ექთნის გარდაცვალების შემდეგ, თუ წინასწარ ვიცოდით და ვაქცინის გვერდით მოვლენებშიც ეწერა, რომ შესაძლოა, ანაფილაქსიური მაჩვენებლები დაფიქსირდეს? იყო, თუ არა მზად საჭირო დოზა ალერგიული რეაქციის შემთხვევაში მყისიერად გასაკეთებლად, (როგორც ამაზე ექიმმა ნანა გეგეჭკორმა ისაუბრა), თამარ გაბუნიას ამაზე კომენტარი არ გაუკეთებია. რა წერია კიდევ ვაქცინის ანოტაციაში? გაუკეთებთ, თუ არა აცრას, გაუშვით, ინტერვიუები ჩაწეროს, რაც უნდა აკეთოსო? უნდა დააკვირდეთ მინიმუმ ამდენი წუთიო, არ წერია? როგორ და ვინ უნდა დააკვირდესო, რა წერია? – არც ამაზე გვაქვს პასუხი ჯანდაცვის სამინისტროდან.

საქმის ძიება დაიწყო შსს-მ, მაგრამ ამ კითხვებზე პასუხს თუ ვერ მიიღებს, ისე გამოვა, რომ ან არავისი ბრალი იქნება ახალგაზრდა ექთნის გარდაცვალება და ან ერთ კონკრეტულ ექიმს დაადებს ხელს, არადა, აგერ, ჯანდაცვის სამინისტრომ აღიარა, რომ იცოდა მსგავს გართულებებზე, თუმცა, მაინც ამბულატორიებშიც ახორციელებდა აცრას. მაგალითად, დღეს, ამ მიზეზით აიკრძალა ვაქცინაცია ხულოში, ქედაში, შუახევსა და ხელვაჩაურში. რამდენი ასეთი ცეტრი იყო ვაქცინაციის სულ ქვეყანაში, ამაზეც არ ავრცელებს სამინისტრო, ამ ეტაპზე, ინფორმაციას.