აღარ არის დათა პაპა, წავიდა… მისი ოცნება კი ჩვენ უნდა ავასრულოთ – დავით ქაცარავა

ანტისაოკუპაციო მოძრაობის “ძალა ერთობაშია” ლიდერი, დავით ქაცარავა, სოციალურ ქსელში, წერს:

„დათა პაპა. ეს სახელი მგონი ყველამ იცის საქართველოში. აინტერესებს ოკუპაცია თუ არა, დათა პაპა მაინც ყველას გაუგია. აი ის პაპა, რომელიც მავთულხლართების იქეთ ცხოვრობს და ჯიუტად ოცნებობს ერთ მშვენიერ დილას ეს მავთულხლართები აღარ იხილოს თავისი სახლის წინ და კვლავ შეძლოს დაბრკოლების გარეშე თავის საყვარელ ხურვალეთში გადაადგილება. ის დათა პაპა, ვისთანაც ბოლო 10 წლის განმავლობაში საქართველოში ჩამოსული თითქმის ყველა ოფიციალური პირი ოფიციალური ვიზიტით მიდიოდა ხურვალეთში და მავთულხლართებიდან ხელს ართმევდა. ის დათა პაპა, რომელიც ოკუპანტების ზეწოლის მიუხედავად, არ ცვლიდა ქართულ პასპორტს და ჯიუტად ელოდა დეოკუპაციას. აი ის დათა პაპა, რომელიც ჩვენთვის საქართველოს სიყვარულის და სამოქალაქო წინააღმდეგობის სიმბოლოდ იყო ქცეული, აღარ არის. დათა პაპა წავიდა. მისი ოცნება კი ჩვენ უნდა ავასრულოთ. ერთ მშვენიერ დღეს შენი სახლის წინ მავთულხლართები აღარ იქნება. გპირდები. მშვიდობით, დათა პაპა.“

ხურვალეთელი დათა ვანიშვილი, რომელი დათა პაპას სახელით იყო ცნობილი, გარდაიცვალა.

ინფორმაციას სუს-ი ადასტურებს.

მისი სახლი ოკუპირებულ ტერიტორიაზე 2012 წელს მოჰყვა, თუმცა მან სახლის დატოვებაზე უარი თქვა და მავთულხლართებს მიღმა მეუღლესთან ერთად დარჩა.

2014 წელს ის ოკუპანტებმა პენსიის ასაღებად ცენტრ ხელისუფლების მიერ კონტროლირებად ტერიტორიაზე გადმოსვლის გამო დააკავეს.

დათა ვანიშვილი 88 წლის იყო.