ბაისტენდერი, ჰეითერი, ფლეიმინგი, დოქსინგი, ფიშინგი – სიტყვები, რომელთა ცოდნა აუცილებელია პოლიტიკოსების ნათქვამის ქართულად სათარგმნელად

ბოლო დროს, პოლიტიკოსებმა უმატეს უცხო სიტყვების გამოყენებას. ბოტი, ტროლი და კლასტერი გადავიტანეთ, მაგრამ ყველაფერი ასე მარტივად არ არის, წვიმას ცხრა სახელი აქვს და ცუდი კომენტარის ავტორს 15, ან 25, დაცინვას 32 სახელი შეიძლება ჰქონდეს და ა.შ.

“ეტალონმა” ცოტა ხნის წინ, გარკვეული განმარტებები გამოაქვეყნა, მშობლებისა და მასწავლებლებისთვის. თუმცა, ვფიქრობ, ამ სიტყვების განმარტების ცოდნა უკვე ყველას გვჭირდება, სხვა შემთხვევაში, ცოტა რთული იქნება გავიგოთ, რის თქმას ცდილობენ ჩვენი პოლიტიკოსები.

ბაისტენდერი (ინგლ. Bystander): სკოლაში, ონლაინსივრცეში, ან სხვა ადგილას დევნის მომსწრე ან მოწმე. ეს შეიძლება იყოს დაზარალებულის ან აგრესორის მეგობარი, თანაკლასელი, პედაგოგი ან სხვა პირი. ბაისტენდერი მომსწრეა დაშინების ფაქტის, რომელიც მოხდა სკოლის შიგნით, გარეთ ან ონლაინსივრცეში;

გრუმინგი (ინგლ. Grooming): მოზარდის ან არასრულწლოვნის დაყოლიება სექსუალურ ქმედებაზე ინტერნეტის მეშვეობით.

დატროლვა/ტროლინგი (ინგლ. Trolling): მომხმარებელთა მაპროვოცირებელი ან დამცინავი კომენტარების გამოქვეყნება სოციალურ ქსელში;

დოქსინგი (ინგლ. Doxing): პირადი მონაცემების, ან საიდენტიფიკაციო ინფორმაციის გამოქვეყნება კონკრეტული ფიზიკური პირის შესახებ ინტერნეტში, როგორც წესი, უარყოფითი განზრახვით;

ლიურინგი (ინგლ. Luring – შეცდენა): მოზიდვა, შეცდენა ან დაყოლიება, რომელიც გულისხმობს ხრიკების მეშვეობით არასრულწლოვანთა სექსუალურ ქმედებაზე დაყოლიებას სრულწლოვანთა მიერ ონლაინკავშირის მეშვეობით;

სენსიტიური მონაცემები: პერსონალური მონაცემები, რომლებიც ეხება ადამიანის ფიზიკურ და ზნეობრივ მონაცემებს, მათ პირად ცხოვრებას, თვისებებს, რასობრივ წარმომავლობას, იდეოლოგიას, პოლიტიკურ შეხედულებებს, რწმენას ან რელიგიურ მრწამსს, ნასამართლეობის მონაცემებს, ფიზიკური ან მენტალური ჯანმრთელობის მდგომარეობასა და სექსუალურ ორიენტაციას;

ფიშინგი (ინგლ. Fishing): ციფრული თაღლითობა, როგორც წესი, განხორციელებული ელექტრონული ფოსტის მეშვეობით, რაც გამოიხატება ყალბი შეთავაზებებით მომხმარებლის მოსატყუებლად, კონფიდენციალური ინფორმაციის გამოძალვის მიზნით, როგორიცაა, მაგალითად, საბანკო ანგარიშები, პაროლები და სხვა;

ფლეიმინგი (ინგლ Flaming): შეურაცხმყოფელი გამოთქმების ან ძალადობრივი ენის/შეტყობინებების გამოყენება ციფრულ სივრცეში;

ჰეითერები (ინგლ. Haters): ინტერნეტმომხარებლები, იგივე გამომწერები, რომლებიც სოციალურ ქსელებში, აპლიკაციებში, ან ჩატში ტოვებენ ნეგატიურ კომენტარებს გარკვეული თემების ან სხვა მომხმარებლების წინააღმდეგ.

ფოტო – მედიაჩეკერი