“ვაქცინის ჩამოტანის თარიღს აღარ დავასახელებ” – ვის ეჯიბრება ჯანდაცვის სამინისტრო?

ჯანდაცვის მინისტრის მოადგილე, თამარ გაბუნია აცხადებს, რომ ქვეყანაში ვაქცინის ჩამოტანის თარიღს იქამდე აღარ დაასახელებს, ვიდრე ავიაბილეთის თარიღი არ იქნება ცნობილი.

“როდის იქნება კონკრეტული თარიღი, ამასთან დაკავშირებით მიდის ისევ კონსულტაციები, მე დღეს ამას აღარ დავასახელებ, ვიდრე არ იქნება კონკრეტულად ავიაბილეთის კონკრეტული თარიღი, რითიც ჩამოვა ეს ტვირთი აქ, უკვე ძალიან რთულია და მე მესმის დაბნეულობასაც იწვევს საზოგადოებისთვის ეს გადავადებების დააანონსება”, – თქვა გაბუნიას რუსთავი-2-ის ეთერში.

ჯანდაცვის სამინისტრო ვის უდგება ჯიბრში, გაუგებარია – ამ ვაქცინაზეა დამოკიდებული ქვეყნის უსაფრთხო გახსნა, როგორც თავადვე ამბობენ და დაპირება, რომ ერთ-ერთი პირველები მივიღებდით ვაქცინას, ტყუილი გამოდგა, მაგრამ პასუხისმგებლობის აღების ნაცვლად – ახლა რას ვაკეთებთ და რა გეგმა გაქვთ არ გეტყვითო? შეიძლება სახელმწიფომ ეს გვიპასუხოს? პირად ნივთს კი არ ყიდულობთ სახლისთვის, ქვეყნისთვის საყიდელ ვაქცინაზეა საუბარი!

დაპირება რომ ვერ აასრულეს, ის მაინც მოგვიყვნენ, რა მოხდა, გადააგდო ჩვენი ხელისუფლება ვინმემ, თუ როგორ მოხდა, რომ უამრავი ექიმის ნათქვამი, ვაქცინას აგერ ნახავთ, დროულად ვერ ჩამოიტანენო, გამართლდა?

პასუხისმგებლობის აღების ნაცვლად და იმის ნაცვლად, სიმართლე გვითხრათ, გვებუტებიან.