მსხვერპლით დასრულდა სპეცოპერაცია ზუგდიდში. ოქროს ბირჟის დაყაჩაღებაში ბრალდებული გარდაიცვალა.
ყაჩაღობა დღის პირველ ნახევარში მოხდა. შეიარაღებულმა პირმა ერთერთ გამყიდველს ოქროს ნივთები იარაღის მუქარით გასტაცა და შემთხვევის ადგილიდან მიიმალა.
რუსთაველის ქუჩიდან მოშორებით, სავარაუდო დამნაშავემ, მას შემდეგ რაც სამართალდამცველები შენიშნა, მათი მიმართულებით ცეცხლი გახსნა, რასაც პოლიციის მხრიდან საპასუხო სროლა მოჰყვა.
შსს-ს ინფორმაციით, გარდაცვალების მიზეზის დასადგენად შესაბამისი ექსპერტიზა ჩატარდება.
სახელმწიფო ინსპექტორის სამსახურის საგამოძიებო დეპარტამენტმა ზუგდიდში, დევნის ოპერაციის მიმდინარეობისას, შსს-ს თანამშრომლების მიერ, იარაღის გამოყენებით, სამსახურებრივი უფლებამოსილების სავარაუდო გადამეტების ფაქტზე გამოძიება დაიწყო.
გამოძიება სსკ-ს 333-ე მუხლის მე-3 ნაწილის „ბ” ქვეპუნქტით დაიწყო.
„სახელმწიფო ინსპექტორის სამსახურის საგამოძიებო დეპარტამენტის გამომძიებლების მიერ ამ ეტაპზე ტარდება პირველადი საგამოძიებო მოქმედებები – ექსპერტების მონაწილეობით მიმდინარეობს შემთხვევის ადგილის დათვალიერება და ნივთიერი მტკიცებულებების მოპოვება. ასევე, ხდება მოწმეთა იდენტიფიცირება მათი გამოკითხვისა და მათთან სხვა საჭირო საგამოძიებო/საპროცესო მოქმედებების ჩატარების მიზნით. დღესვე, დაინიშნება სამედიცინო ექსპერტიზა“ – ნათქვამია სახელმწიფო ინსპექტორის სამსახურის ინფორმაციაში.
კომენტარები