არჩევნების გაყალბება პოლიტიკის გაყალბების ბრალია, პოლიტიკაში დამკვიდრებული სიცრუის, სიტყვის გატეხვის და ღალატის ბრალი. ამიტომ ვიდრე პოლიტიკაზე ან რამე საქმეზე დავიწყებთ საუბარს და გეგმებს დავაწყობთ, ჯერ წესებზე უნდა შევთანხმდეთ, – ამის შესახებ “ლელო საქართველოს” ლიდერი მამუკა ხაზარაძე სოციალურ ქსელში წერს.
როგორც ხაზარაძე Facebook-ზე წერს, პოლიტიკა ბინძური იქნება მანამ სანამ, პირადი გამორჩენის იმედით საქმის კეთება არ დასრუდება და პოლიტიკური ველი არ გაიწმინდება.
“არჩევნების გაყალბება პოლიტიკის გაყალბების ბრალია, პოლიტიკაში დამკვიდრებული სიცრუის, სიტყვის გატეხვის და ღალატის ბრალი. ამიტომ ვიდრე პოლიტიკაზე ან რამე საქმეზე დავიწყებთ საუბარს და გეგმებს დავაწყობთ, ჯერ წესებზე უნდა შევთანხმდეთ. “ჯერ წესია საქმე და მერე საქმეა საქმეო,” – ყველას გვახსოვს ეს სიტყვები ჭაბუა ამირეჯიბის რომანიდან. ჯერ საერთო წესზე შევთანხმდეთ – იმ მორალური, ეთიკური და ღირსების პრინციპების დაცვაზე, რომელიც ქართველ კაცს ისტორიულად მოსდევს. უნდა დავაწესოთ, რომ არცერთი საქმე არ გამოვა თუ არ გვეცოდინება სიტყვის ფასი, თავისუფლების ფასი, თვალებში ჩახედვის და ხელის ჩამორთმევის ფასი, თუ უარს არ ვეტყვით ღალატს, სიცრუეს, მონობას, საქვეყნო ინტერესზე წინ პირადის დაყენებას.
პოლიტიკა ბინძური საქმეაო, ამბობენ, ყველა საქმე ბინძურია, თუ მას ჭუჭყიანი ხელით, ღვარძლით, ცილისწამებით და პირადი გამორჩენით აკეთებ. და პოლიტიკა ბინძური იქნება იქამდე, ვიდრე ეს არ დამთავრდება, ვიდრე ეს ველი არ გაიწმინდება. ერთი წელია პოლიტიკაში ვარ და მივხვდი – ყველას, ვისაც პასუხისმგებლობა აქვს ამ ქვეყნის წინაშე, საკუთარი ამომრჩევლის წინაშე, ჯერ ამ მარტივ წესებზე უნდა შეთანხმდეს და ბოლომდე დაიცვას. მე მჯერა, რომ “ლელო” ამ სტანდარტს შექმნის და დაამკვიდრებს ქართულ პოლიტიკაში”, – წერს მამუკა ხაზარაძე.
ცნობისთვის, გუშინ პარტია ,,მოქალაქეების” ლიდერი ალეკო ელისაშვილი და ,,ლელო საქართველოსთვის” ლიდერი მამუკა ხაზარაძე ერთმანეთს დაუპირისპირდნენ. ,,რუსთავი 2-ის” ეთერში მწვავე კამათის დროს პოლიტიკოსებმა ერთმანეთისკენ გაიწიეს, თუმცა ვითარების განმუხტვა ჟურნალისტებმა შეძლეს.
კომენტარები