სამეგრელოში, მამის მკვლელობაში ბრალდებულს წინასწარი პატიმრობა შეეფარდა

ზუგდიდში, ქალაქის რაიონულმა სასამართლომ მამის მკვლელობაში ბრალდებულ კობა წურწუმიას აღკვეთის ღონისძიების სახედ წინასწარი პატიმრობა შეუფარდა.

ბრალდებულ წურწუმიას დამამძიმებელ გარემოებაში ჩადენილი განზრახ მკვლელობა ედება ბრალად.

ინფორმაციისთვის, ბრალდებულმა მიმდინარე წლის 8 იანვარს, ჩხოროწყუს მუნიციპალიტეტის სოფელ ლეწურწუმეში, საკუთარ საცხოვრებელ სახლში, ყოფით ნიადაგზე დაწყებული ურთიერთშელაპარაკების შემდეგ, მამას – 1958 წელს დაბადებულ ნ.წ.-ს ცივი იარაღით გულ-მკერდის არეში სასიკვდილო ჭრილობა მიაყენა, რის შემდეგაც იმავე დანით თვითდაზიანებები მიიყენა.

დამამძიმებელ გარემოებაში ოჯახის წევრის მიმართ ჩადენილი განზრახ მკვლელობის ფაქტზე გამოძიება საქართველოს სისხლის სამართლის კოდექსის 11 პრიმა-109-ე მუხლის მე-2 ნაწილის „ვ” ქვეპუნქტით მიმდინარეობს. დანაშაული 13-დან 17 წლამდე თავისუფლების აღკვეთას ითვალისწინებს.