საერთაშორისო სანქციების მიუხედავად, ჩრდილოეთ კორეა გეგმავს, გაზარდოს სამხედრო შეიარაღება, – ამის შესახებ Deutsche Welle ქვეყნის სახელმწიფო მედიაზე დაყრდნობით წერს.
ჩრდილოეთ კორეის ლიდერმა, კიმ ჩენ ინმა მმართველი, შრომის პარტიის ყრილობაზე სიტყვით გამოსვლისას თქვა, რომ აპირებს, „თავდაცვის შესაძლებლობებს გაცილებით მაღალ დონეზე გაზრდის გზით, დაიცვას ქვეყნის უსაფრთხოება“.
უცნობია, გულისხმობს თუ არა კიმ ჩენ ინი ბირთვული პროგრამის გაძლიერებას.
მედია ხაზს უსვამს იმ გარემოებასაც, რომ ინის განცხადებამდე ერთი დღით ადრე, საზოგადოებამ ჩრდილოეთ კორეის ლიდერის უჩვეულო ფოტო იხილა – ქვეყნის სახელმწიფო მედიამ გამოაქვეყნა ფოტო, რომელზეც ჩანს კიმ ჩენ ინის პორტრეტი. ინს სამხედრო ფორმა აცვია, რაც მისი მმართველობის განმავლობაში არც ერთხელ არ მომხდარა. 2011 წლიდან, მას შემდეგ, რაც კიმ ჩენ ინმა მამამისის, კიმ ჩენ ირის გარდაცვალების შემდეგ, თანამდებობა გადაიბარა, საზოგადოების წინაშე ყოველთვის სამოქალაქო ჩაცმულობით ჩნდებოდა.
კომენტარები