38 წლის მამაკაცი, ზურაბ ბენაშვილი თელავის რაიონის სოფელ ფშაველში ცოლისძმამ, 24 წლის თომა ბაბისაშვილმა სანადირო თოფიდან გასროლით მოკლა. გასროლის ხმა დილის საათებში მეზობლებმა გაიგეს და წივილ-კივილზე ქუჩაში გასულებს მამაკაცი უკვე გარდაცვლილი დახვდათ, მას სიცოცხლის ნიშანწყალი არ ეტყობოდა. მოკლულს თოფით ჭრილობა თავის არეში აქვს მიყენებული.
დანაშაულში ბრალდებულს შემთხვევის ადგილიდან გაქცევა არ უცდია, ის სამართალდამცავებმა მალევე დააკავეს, ნივთმტკიცებად ამოღებულია დანაშაულის ჩადენის იარაღი – სანადირო თოფი. საქმე 108-ე, განზრახ მკვლელობის მუხლით აღიძრა, რაც 7-დან 15 წლამდე ვადით თავისუფლების აღკვეთას ითვალისწინებს. შემთხვევის ადგილზე სამართალდამცავები დიდხანს მუშაობდნენ. შემდეგ ცხედარი პროზექტურაში გადაასვენეს.
დაკავებულის მამა თამაზ ბაბისაშვილი დეტალებს “კურიერთნ” იხსენებს და ყვება, რომ ყოფილ სიძეს არ იცნობდა, მასთან ურთიერთობა არ ჰქონდა, თუმცა შვილისგან იცოდა, რომ მეუღლესთან შერიგება აღარ სურდა. ქალი ძმასთან ცხოვრობდა, სადაც ყოფილი მეუღლე ეტაპობრივად აკითხავდა. დაკავებული თომა ბაბისაშვილის მამა არ გამორიცხავს, რომ დღავანდელი სისხლიანი დაპირისპირებაც ამ მიზეზით მოხდა.
“მიმალავდა ყველაფერს ჩემი შვილი, არ უნდოდა რამე შარში გავეხვიე და თვითონ დააბოლოვა ყველაფერი. რუსთავიდან ჩამოსულა, ალბათ თავის ცოლის წაყვანა უნდოდა და ამან არ შეუშვა ეზოში. დაპირისპირება იქნებოდა, ერთხელ უსვრია, მე არ ვიყავი აქ, ეზოს კარებში მოხდა ყველაფერი. სხვისი იარაღი იყო, ნათხოვარი ჰქონდა. რისთვის ჩამოვიდა საერთოდ, დაღუპა ჩემი შვილი,”-უთხრა “კურიერს” მკვლელობაში ბრალდებულის მამამ.
კომენტარები